No.752/2021-2022

Aizawl, 31st May, 2021 : Vawiin khan Information & Public Relations Director Pi Lallianpuii chuan ama office chamber-ah Mizoram Journalists’ Association Gen. Hqrs. President Pu Zonunsanga Khiangte hnenah Press Accreditation Card thar (2021-23) a hlan.

I&PR Director Pi Lallianpui chuan Covid-19 hripui leng karah hun harsa tak hmachhawn mek ni mahse, sorkarin media a ngaih pawimawh em avangin Press Accreditation Card-te chu peihfel theih hram a ni ta a ni a ti a. Press Accreditation hi kum 2 chhung a nung (valid) a ni tih sawiin Pi Lallianpuii chuan tlai lo tura chak taka hmalak ni chungin lockdown puan a nih takah chuan a hun takah tihchhuah a ni thei ta lo chu pawi a tih thu a sawi bawk. Accreditation hian hamthatna lian tham tak tak keng hran lo mahse a hlu em em a, journalist nazawng hnena sorkarin a pek duh loh a nih thu te, khawiah pawh media mite tan chuan ‘identitity card’ nih a tlin thu leh khawvel hriatah pawh sorkar hriatpui ngeia Accredited Journalist nihna chuan zahawmna a keng tel a ni a ti. MJA lam pawhin journalist-te zingah mahni Accreditation Card dik lo taka hmang emaw dan phalloh thilah inhnamhnawih an awm a nih chuan a ranglama inhriattir vat turin a chah bawk.

I&PR Director chuan Press Accreditation Card chu a hluin sorkara nodal department Information & Public Relations chuan tehfung hrang hrang hmangin uluk takin journalist-te hnenah a pe thin a. Tun hnaia social media-a lo lang Real Life MIZORAM YouTube Channel ten ‘social media card’ nei anga an insawi chu khawi establishment atang mahin a pekchhuah theih loh, thil awmze nei lo a ni a, hemi chungchang hi chhui mek a nih thu a sawi.

Mizoram Journalists’ Association Gen. Hqrs. President Pu Zonunsanga Khiangte pawhin lawmthu sawiin tunlai lockdown boruakah media mite tan chuan nitin awrhchhuah ngai a nih avangin Press Accreditation Card thar chu an nghakhlelh hle a, I&PR Department-in hrileng karah pawh beisei aia rangin Card thar a siam sak theih ta chu a vanneihthlak hle a ni a ti. Sorkara nodal department I&PR leh MJA inkarah thawhhona tha chhawm nung reng turin theihtawp chhuah zel a pawimawh thu a sawi bawk.

Vawiina I&PR Director-in a semchhuah tak Press Accreditation Card-te hi Aizawl District huamchhung chauh a ni rih a, hrileng boruak a ziaawm veleh District dangah thawnchhuah dan tur ngaihtuah a ni ang.

Attachment

  • Loading attachment...