No.753/2021-2022

Kolasib dated 31st May 2021: Vawiin chawhnu khan District Fire Prevention Committee, Kolasib district chuan DC Conference Hall, Kolasibah thutkhawmna neiin kangmei lak a invenna kawng a hma la tha khua thlan chhuahna hun an nei a. Kum 2020 khan hrileng avangin kangmei venna kawng a titha zual thlan chhuahna hi neih a ni lova, kumin hian Kolasib district bik atan Thingthelh khua thlan an ni.

Thutkhawmna hun kaihruaitu Dr.H.Lalthlangliana chuan kumin a Mizoram district hmun hrang hrangah kangmei nasa tak a chhuak chu pawi a tih thu sawiin Kolasib district hmun thenkhat a kangmei chhuakte erawh Sawrkar leh khawtlang thawhhona zarah rang tak a thelh mih a nih thu a tarlang. Hrileng avanga ram pum a hun khirhkhan tak hmachhawn mek a nih rualin fimkhur tak a Green Mizoram Day pual a thing tiak phun kalpui dan tur sawiho a ni a. June ni 11, 2021 hian Saidan field, Kolasibah sawm bikte nen Green Mizoram Day khuh hawnna hun hman tum a ni.

Kolasib DFO Pi N.Viji, IFS chuan Kolasib district chhung a ram kang thlen dan tlangpui tarlanna hun neiin tum 361 ram kang report dawn a nih thu a sawi a, a zau zawng hi FSI report atanga a lan danin Hectare 323.71 a zau a ni. Heng ram kang zing a Hectare 307.41 te chu lo halna niin hmun dang a kangmei chhuakte pawh rang tak a thelh a nih thu ngaihthlak a ni bawk.

Kum 2021 chhung a ram kang venna kawng a hma la tha khua thlan chhuahna atan hian tehfung hrang hrang hmang a endikna neih a ni a. Village Council leh Branch YMA report-te bakah Forest Department Official leh BDO hnen atangin khawtlang hmalak dan tlangpuite ngaihthlak a ni. Pakhatna hi Thingthelh khua niin pahnihna hi Khamrang an ni a, N.Chhimluangin pathumna dinhmun an hauh bawk a ni. Pakhatna hian cheng sing nga a keng tel a, pahnihna leh pathumna hian cheng sing thum leh cheng sing hnih a keng tel bawk a ni.