No.5780/2020-2021

Lawngtlai, Khuangchawi thla ni 5, 2020: Vawiin khan Lawngtlai Bawrhsap Dr Andrew H. Vanlaldika hovin a office chamber-ah Lawngtlai District chhunga inbiak pawhna leh internet service tihchangtlun dan tur leh hmasawn theih dan tur hrang hrang sawi ho a ni a. BSNL (Bharat Sanchar Nigam Limited), Bharti Infratel Limited (Airtel) leh Jio lam ai awhte an tel.

Bawrhsap Dr Andrew H. Vanlaldika chuan khawvel thang chho mekah inbiak pawhna tha lo chuan hna thawh a tiharsa thin hle tih sawiin, Lawngtlai District chuan inbiak pawhna leh internet service-ah hun rei tak chhung harsatna a lo tawk tawh tih a sawi a. COVID-19 hri leng vanga zirlaite tana online class kalpui a nih hnuah phei chuan District mipui, a bik takin zirlaite leh nu leh pate'n harsatna an tawk nasa zual tih sawiin, internet service pe chhuaktu (provider)-te chu tan la leh zual turin a chah a. Mipuiin an sum sen ang hu service an hmu pha lo nasa hle chu ngaihthah chi a ni lo, a ti.

He thut khawma tel service provider-te chuan an harsatna tawh hrang hrang sawiin, khawl chak tawk tawh lo leh consumer tam zel vanga khawlin a zawh loh te, tower din belh ngai te, khuarel leh mihring kut avanga hrui chat nasa te, thawktu indaih lohna leh COVID-19 vanga an harsatna tawh hrang hrangte an tar lang a. He'ng harsatna hrang hrangte hi chin fel a nih theih dan tur sawi ho nghal a ni.

Service provider-te chuan mipuite harsatna an hriatpui thu leh theih tawp an chhuah ve thin thu sawiin, khawl thila harsatna tam tak chu mipuite paw'n hriat thiampui se an duh thu an sawi a. Mipuiin harsatna an tawhte chu social media-a phun lungawipui mai lovin, service provider-te hnenah thlen thin se, harsatna tam tak chu chin fel theih a nih an beisei thu an sawi bawk.

Lawngtlai khawpui chhung bikah BSNL hian Chawnhu leh Vengpui-ah tower neiin, tower dang pakhat a awm belh leh chuan ziaawm tura beisei a ni a. Airtel-in Lawngtlai khawpui chhung bikah tower site 5 neiin, Circuit House-a tower thar dah tur leh power backup neih te chu harsatna zualpui chin fel nan buaipui thuai ni se, tih a ni a. Jio chuan Chawnhu leh College Vengah tower neiin, hei hian L-IV leh Council Veng a chawm tel bak chu Lawngtlai khawpui pum an tuam theih rih loh avangin tower thar dah belh a tul thu tar lan a ni bawk.

He'ng service provider-te hian District pum tuam tura hma la chho mekin, tower pawh an din belh mek a. Bharti Infratel Limited chuan Department of Telecom hnuaia Universal Service Obligation Fund (USOF) atangin Lawngtlai District chhunga inbiak pawhna tichangtlung turin Comprehensive Telecom Development Plan for North-Eastern Region (CTDP-NER) an kalpui mek a, tower 84 din turah 60 chuang chu a taka puitlin a ni tawh a, a dang pawh thawh mek a ni.