No.1198/2021-2022

Lawngtlai, Vawkhniahzawn thla ni 1, 2021: Vawiin khan Lawngtlai District Level Task Force on COVID-19 (DLTF) chu an Chairman, Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an thu khawm a. COVID-19 hri leng laka him nana state sawrkar ruahmanna zulzuia Lawngtlai District chhunga ni 30.06.2021 atanga ni 15.07.2021 inkar chhunga inkhuahkhirhna kalpui dan tur an rel.

Chairman, Dr Andrew H. Vanlaldika chuan COVID-19 hri leng laka him nana inkhuahkhirhna kalpui kawngah sawrkar hna thawk, tlawmngai pawl, kohhran leh mipui te thawhpuina avangin Lawngtlai District dinhmun a ziaawm tih sawiin, lawm thu a sawi a. Hri leng laka District him nana thawktute an hah hle tih sawiin, an thawh rimna leh an hahna te a thlawn a chan loh nan mipuite chu thu awih a, inkaihhruainate tha taka zawm turin a chah.

DLTF Member Secretary, Chief Medical Officer Dr LP Malsawma chuan COVID-19 hri leng kaihhnawiha Lawngtlai District dinhmun tlangpui a tar lang a. Tun dinhmunah Lawngtlai District chhungah COVID-19 positive (active case) mi 255 an awm mek thu leh CCC, 4C leh Home Isolation-ah te enkawl an nih thu a sawi.

He DLTF thut khawmah hian COVID-19 hri leng tiziaawm tura Lawngtlai District chhunga hma lak dan tur leh July ni 15, 2021 (Ningani) zanlai dar 12:00 thleng inkhuahkhirhna kalpui chhunzawm dan tur sawi ho a ni a. Mizoram sawrkarin Mizoram puma hman tur inkhuahkhirhna leh inkaihhruaina a duante chu Lawngtlai District chhungah zawm vek tur a ni a, hemi bak DC-te ruahmannaa dahte kalpui dan tur chu vawiin hian rel a ni.

Dawr zawng zawng chu Pathianni tih lohvah ni tin zing dar 6:00 atanga chawhnu dar 1:00 thleng hawn phal a ni a. Amaherawhchu, sawrkar inkaihhruainaa tar lan a nih angin, dawr nghaktute chu dose khat tal COVID-19 hri danna la tawh an nih a tul dawn a, bazar leh dawrah te COVID-19 laka him nana fimkhurna dan zam (COVID-19 Appropriate Behaviour) - inhnaih chilh loh, hmai tuam that, kut tihthianghlimna hman leh a dangte tha taka zawm tur a nih bakah, dawrkaite'n anmahni dawrtute tha taka an chhinchhiah a tul dawn bawk a ni.

Dawr hawn phal hun chhung (ni tin zing dar 6:00 leh chawhnu dar 1:00 inkar) hian auto rickshaw leh taxi te chu an tlan phalsak a ni a. He'ng sumdawng lirthei khalhtute hi dose khat tal COVID-19 hri danna la tawh an nih chauhvin tlan chhuah phalsak an ni dawn a. COVID-19 Appropriate Behaviour tha taka an zawm a tul dawn bawk a ni.

Hna thawh leh eizawnna thila ram kal/feh chungchang chu a pangngai angin, VLTF-te hriatpuina leh remtihna hmanga kalpui theih a ni a. Khawpui pawn lama hna thawka chhuakte chu zing dar 10:00 leh tlai dar 5:00 inkarah khawpui chhunga an veivah a rem dawn lo va. Khawpui chhunga bungraw hlan emaw, hlan thlak emaw chu zan dar 7:30 leh zing dar 4:00 inkarah tih tur a ni bawk ang.

Hemi hun chhunga infiamna lam kalpui theih chin in chhungah mi 10 aia tam lo leh pawn lamah mi 25 aia tam lo tih chu phal a nih rualin, a kalpui dan tur kimchang ruahman chu sports discipline hrang hrang association leh infiamna hmun neitute kutah dah a ni a. Taksa sawizawi nana pawna tlan emaw, kal emaw chu zing lamah dar 4:00 atanga dar 7:00 inkar chhung leh tlai lamah dar 5:00 atanga dar 6:30 inkar chhung phal a ni.

Hemi inkhuahkhirhna hman hun chhung hian zan dar 7:00 atanga a tuk zing dar 4:00 thleng zan tin pawn chhuah khap bur (curfew) chu chhunzawm tur a ni a. Sawrkar office-te chu a pawimawh zual leh sawrkar inkaihhruainain a phal chin office kaiin, a bakin in lam atanga hna thawh chu kalpui chhunzawm a ni dawn a ni.

State sawrkarin Mizoram puma inkhuahkhirhna thupek a chhuah, clause 5.1 angin, "Hemi hun chhung hian eizawnna leh tul bik thil ni lova veivah leh inlen pawh khap tlat a ni" a. Eizawnna leh tul bik thila chhuah ngaite chuan mahni veng VLTF-te hriatpuina lehkha an lak zel a ngai dawn a. Police, Executive Duty leh VLTF-te khauh taka duty-in, inkhuahkhirhna zawm lo leh COVID-19 laka himna tura sawrkarin dan a siamte bawhchhia chu dan angin an hrem zel dawn a ni.

Lawngtlai District chhunga inkhuahkhirhna kalpui dan tur kimchang chu Deputy Commissioner-in a la tichhuak dawn a ni.