4281/2023-2024

2024 Vau thla ni 21: Vawiin khan Lawngtlai District Level Committee on Fire Prevention (DLCFP) chu an Chairman, Lawngtlai Bawrhsap Pu Cheemala Siva Gopal Reddy hovin Lawngtlai DC Conference Hall-ah an ṭhu khawm a. Kum 2024-2025 atana ram kang ven kawnga hma lak dan tur hrang hrang an sawi ho.

Chairman Pu Cheemala Siva Gopal Reddy chuan ram kang leh kangmei chhuakin leilung leh boruak tichhiain, bungrua leh nunna channa hial a thlen ṭhin tih sawiin, fimkhur leh inven ngun a ṭul hle tih a sawi a. Lawngtlai District-ah kangmei chhuak a nasat ṭhin avangin inzirtirna uar lehzuala kalpui ṭul a tih thu sawiin, member kal khawmte chu kangmei ven kawnga hma lakna turah ngunthluk taka ngaihtuahna seng turin a sawm a ni.

Lai Autonomous District Council (LADC)-a District Council Conservator of Forests (DCCF) Pu K. Lalromawia chuan kum kal meka kangmei ven kawnga hma lakna report pein, kum 2024-2025 chhung atana hma lakna tur hmachhawp an duan sate a tar lang a. Member-te aṭanga rawtna awmte nen kum thara hma lakna tur chu sawi ho va, pawm fel nghal a ni.

Kum thara kangmei ven kawnga hma lakna tur hrang hrang zingah mei kawng sialna tur te, Lawngtlai District chhung khaw hrang hranga kangmei venna lam inzirtirna (awareness campaign) buatsaihna tur te, thuziak leh hmanraw hrang hrang hmanga inzirtirna puanzarna tur leh intihsiakna buatsaihna tur te, kangmei chhuak tur vengtu (fire watcher) rawihna tur te, kum 2025-a kangmei ven hapta (fire prevention week) hawnna buatsaihna tur leh kangmei veng ṭha khuate hnena lawmman (village level award) pek tur ruahmanna te a tel a ni.