No.7375/2020-2021

 Vawiin khan Lawngtlai District Level Committee on Fire Prevention (DLCFP) chu Lawngtlai Additional Deputy Commissioner Pi Marilyn Rualzakhumthangi hovin DC Conference Hall-ah an thu khawm a. Kangmei ven kawnga hma lak dan tur hrang hrang an sawi ho.

Pi Marilyn Rualzakhumthangi chuan sik leh sa nuam tak leh boruak hrisel kan neih theih nana ramngaw humhalh nan kangmei ven chu thil pawimawh ber pakhat a nih thu leh inthlahdah lova inzirtir reng a tul thu sawiin, theih tawp chhuaha tan la turin member kal khawmte chu a sawm a. Member Secretary, LADC-a DCCF Pu K. Lalromawia hnen atangin kum hmasa lama hma lak dan report ngaihthlak a ni a. Kumin atana hma lak dan tur hrang hrang sawi ho zui nghal a ni.

Kumina hma lakna tur hrang hrang zingah, February ni 8-13, 2021 chhunga hman tur Fire Prevention Week 2021 hawnna chu February ni 8 chawhma dar 11-ah DC Conference Hall-ah neih ni se, tih a ni a. Hemi atan hian programme pawh ruahman nghal niin, he hunah hian kum 2020-a kangmei veng tha khua thlan chhuahte hnenah 'Village Level Fire Prevention Award 2020' lawmman hlan a ni ang.

Kumin hian Lawngtlai District chhunga kangmei chhuak tamna khua/vengah inzirtirna (awareness campaign) buatsaih remtih niin, zirna in hrang hrangah zirtirtute'n kangmei ven pawimawhzia inzirtirna hun buatsaih se, tih a ni a. State Level Committee-in lo hal theih hun chhung a bituk March ni 15 chu zawm ve tur leh leipui/huan hal hun hran bithliah tura District Council thuneitute ngen leh sapela ram vah leh ram hal khapna tichhuak tura DC ngen te rel a ni a. Ram kang tur ven nana mei dai phiah nana MGNREGA inhlawhna dah te, kangmei ven chungchanga mipui zirtirna a tam thei ang bera puangzar tura zirna in, VC, NGO leh media lam ngen te, kangmei venna lam hawi inzirtirna video tawi buatsaih te pawh rel a ni a. Lo/leipui/huan hal turte chu mahni khaw VC-te hnenah inhriattir a, a tul anga venpui dan ngaihtuah ni se, tih a ni bawk.

Kumin Fire Prevention Week hi February ni 8-13 chhung hman tur niin, thupuiah "Kangmei tichhuak lo turin mi tin i fimkhur ang u" tih hman a ni dawn a. Kangmei ven kawnga thawk tha khuate chawimawina 'Village Level Fire Prevention Award 2021' chu kumin pawh hian siam leh tur niin, Green Mizoram Day-ah lawmman te hi sem a ni ang.


Attachment

  • Loading attachment...