Vawiin khan Lawngtlai District Level Committee on Fire Prevention (DLCFP) chu an Chairman, Lawngtlai Bawrhsap Pi Shashanka Ala, IAS hovin DC Conference Hall-ah an thu khawm a. Kangmei ven kawnga hma lak dan tur hrang hrang an sawi ho.

Chairman chuan kangmei ven kawngah nikum khan Lawngtlai District chu Mizorama pahnihna a nih thu sawiin, kuminah chuan pakhatna ni thei ngei tura tan la turin member-te a sawm a. Member Secretary, LADC-a DCCF Pu K. Lalromawia hnen atangin kum hmasa lama hma lak dan report ngaihthlak a ni a. Kumin atana hma lak dan tur hrang hrang sawi ho zui nghal a ni.

Kumina hma lakna tur hrang hrang zingah, Fire Prevention Week 2020 hawnna chu February ni 10-ah DC Conference Hall-ah neih ni se, tih a ni a. Hemi atan hian programme pawh ruahman nghal a ni. Lawngtlai District chhunga zirna in hrang hranga awareness campaign buatsaih remtih niin, department hrang hrangte'n Green Mizoram Day leh Green LADC Day-a an thing phunte Week hman chhunga tifai tura ngen ni se, tih a ni a. State Level Committee-in lo hal theih hun chhung a bituk March ni 15 chu zawm ve tura District Council thuneitute ngen leh ram kang tur ven nana mei dai phiah nana MGNREGS inhlawhna ni hnih dah te, kangmei ven chungchanga mipui zirtirna a tam thei ang bera puangzar tura zirna in, VC, NGO leh media lam ngen te pawh rel a ni.

Kumin Fire Prevention Week hi February ni 10-15 chhung hman tur niin, thupuiah "Kangmei chhuak tur veng la, i ram chhan rawh" tih hman a ni dawn a. Kangmei ven kawnga thawk tha khuate chawimawina 'Village Level Fire Prevention Award 2020' chu kumin pawh hian siam leh tur niin, Green Mizoram Day-ah lawmman te hi sem a ni ang.