Information & Public Relations Department in kumtina a buatsaih thin Film Artist Training, nithum awh tur chu vawiin khan Pi Lallianpuii, MIS, Director, I&PR Department chuan a hawng a, hawnna inkhawm hi Pi K.Vanlalsangi, MIS, Deputy Director, I&PR Department & State Nodal Officer, Visual Arts Development in a kaihruai a ni.

Pi Lallianpuii chuan ‘Thahnemngai taka Film lama tuite nena kan thawh hona chuan rah tha a chhuah zel a, Lemchangtute pawhin hma kan sawnin a bikin kum 2013 atang khan kan lo buatsaih thin Film Artist Training hian he hmasawnnaah hian bul tumtu nihna lian tak a chang a. Tun tuma training turte pawh hian tihtakzetin bei ula, in training zawh lamah a rah kan lo thlir reng dawn a ni’ a ti.

Tun tuma training hian ni 5 - 7, January 2020 chhung a awh dawn a. Mi 30 chuang training-ah hian an tel a ni.