Sawrkar Laipui Ministry of Textiles leh Mizoram Apex Handloom & Cooperative Society Ltd (MAHCO) tangkawp buatsaih ni thum awh tur Lunglei Special Handloom Expo 2020 chu vawiin chawhma khan Convention Centre tualzawlah neih tan a ni a. Cooperation department changtu Minister Pu C. Lalrinsanga chuan khuallian niin a hawng. He hunah hian Lunglei DC Pu V. Lalsangliana, IAS chu khualzahawm a ni. Hawnna program-ah hian Lunglei HPC Vice Chairman Pu Lawmawma Tochhawng leh sawrkar department official-te, chanchinbu mite, tlawmngai pawl aiawhte leh sawm bik dangte an tel.

Hawnna inkhawm Pu Lalrinawma Pachuau, Managing Director, MAHCO Ltd kaihhruaiah Cooperation Minister chuan Ministry of Textiles leh MAHCO tangkawpin Lungleia Special Handloom Expo an buatsaih chu lawmawm a tih thu sawiin Mizoram Cooperative movement tan hmasawnna pawimawh tak a ni, a ti a. Special Handloom Expo chu puantahtute tana inphochhuahna, hralhna hmun leh mipuite tan pawha awlsam taka an duh zawngte tlawm zawka an lei theihna anih mai piah lamah huam zau zawka Handloom kutchhuakte theh larna pawimawh tak a ni, a ti a. Cooperation Department leh Agriculture Department-te tangkawpin muga silkworm leh la chin lamah chak zawka hmalak a, designer te nen tangkawpa kan Handloom Industry tih changtlun zel a duh thu a tarlang bawk. Handloom industry neitute hnenah pawh fuihna thu sawiin Minister chuan ram pawna thawn chhuah theih khawpa quality tha siam chhuak turin a chah a ni.

He huna khualzahawm Lunglei DC Pu V.Lalsangliana, IAS pawhin thu sawiin handloom leh handicraft tih hmasawn zel chu kan sawrkarin a ngai pawimawh takzet a ni tiin a Department lo thawh thin tawhna Commerce & Industries leh Rural Development hnuaiah te kawng hrang hranga hmalak a nih thu a tarlang a. Kan ram hmasawn tur chuan mahni kutke ngeia eizawnna kawng dap thiam entrepreneurs-te Mizoramin a mawmawh chho zel dawn a ni tiin thalaite pawh sawkar hna chauh tum lova entrepreneurship lam an ngaihven chhoh a tul dawn a ni, a ti bawk. MAHCO-in Lunglei mipuite tan Special Handloom Expo a rawn buatsaih chu kan vannei takzet a ni tiin kalkhawmte duhsakna a hlan a ni.

He hunah hian Lunglei zaithiam Nl Pensy B. Lalthangliani a zai bakah Mizo designer lar Charlee Mathlena leh a team-ten Handloom Fashion Show an buatsaih bawk a ni. Pi Lalremsangpuii, CDE, MAHCO Ltd chuan lawmthu sawina hun a hmang bawk. Expo-ah hian stall sawmhnih pali (24) siam a ni a, 5^th – 7^th February, 2020  chhungin neih a ni dawn a ni.

Minister hian Lunglei a cham chhungin a bial chhunga khua leh veng hrang hrang tlawh kualin sawrkar hmalakna, a bik takin kawngpui siam hna thawh lai mek te a hmunah a enfiah a. Sawrkarin inkalpawhna kawngpui a ngaih pawimawh takzet thu sawiin Lunglei leh Buarpui inkar kawng siamthat hna pawh hun rei tak hnuah hmalak a nih thu leh he kawng hi siam zawh anih hnuah Lunglei District tan hmasawnna tam tak a la thlen ngei a dawn a ni, a ti bawk.