1823/2022-2023 

Mimkut thla ni 5, 2022: Vawiin khan Lawngtlai District Level Committee on Myanmar Refugees chu an Chairman, Lawngtlai Bawrhsap Pu Amol Srivastava hovin Lawngtlai DC Conference Hall-ah an ṭhu khawm.

He hunah hian August ni 31, 2022 aṭanga Lawngtlai District dep ramri hnaih, Myanmar ram chhung Varang leh a chhehvela Myanmar Army leh Arakan Army te an inkah avanga Lawngtlai District chhunga Myanmar raltlan an lo luh belh thu tar lan a ni a. Task Group on Myanmar Refugees Nodal Officer, Lawngtlai Sub-Divisional Officer (Sadar) Pi TT Beikhaizi hnen aṭangin Lawngtlai District chhunga raltlante enkawlna kawnga hma lakna kalpui mek dan ngaihthlak a ni a. Myanmar tualchhung buaina avanga Lawngtlai District chhunga raltlan awm sate leh tuna lo lut tharte dinhmun leh mamawh thlir ho niin, chhawmdawl leh enkawl zui zel dan turte sawi ho a ni bawk.

Task Group on Myanmar Refugees Nodal Officer report aṭanga a lan danin, tun dinhmunah Lawngtlai District chhungah Myanmar aṭanga raltlan lo lut mi 5,909 chhinchhiah tawh an ni a. An zinga mi 589 chu  kar liam taa Myanmar Army leh Arakan Army te inkah avanga sahimna zawnga lo tlan lut thar niin, mi 5,320 chu tualchhung buaina avanga lo lut leh lo awm tawh sa an ni. Raltlan lo lut tharte hi Zochachhuahah mi 115, Hmawngbuchhuahah mi 210, Laitlangah mi 127 leh Dumzautlangah mi 137 an awm a. Community Hall leh in remchanga an inkulh bakah, khawtual mite'n a ṭul danin an lo mikhual a ni.

He'ng raltlan lo lut tharte tan hian an lo awm lailawkna hmun tur bekte (temporary shelter) zar nan silpauline pek ni se, tih a ni a. District Administration aṭangin blanket, commode, hygiene kit leh mamawh dangte pek a nih tur thu sawi lan a ni a. Raltlan chhawmdawlna atana State aṭanga fund dil chu Home Department-ah bawhzui ni se, tih a ni bawk.

Raltlan nei thar khuate hi a ṭul anga chhawmdawlna pe turin ruahmanna siam a ni a. Medical check up chungchangah chuan a ṭul leh mamawh dan azirin Doctors Without Borders te nena thawk hova hma lak tum a ni.