1824/2022-2023  
Aizawl, the 5th September 2022 : Vawiin chawhnu khan District Education Committee, Aizawl District bul tumin Teachers’ Day 2022’ lawmna, Directorate of School Education Conference Hall, Treasury Square-ah neih a ni a. Aizawl DC Dr. Lalhriatzuali Ralte, Chairman, District Education Committee ni bawk chuan he hun hi a hmanpui a ni.

Dr. Lalhriatzuali Ralte chuan zirtir hna chu hna pawimawh leh hna zahawm tak an ni tiin zirtirtute chu ram leh hnam tan an thawhhlawk nasat thu te, zirna pek bakah Sawrkar tan kawng hrang hranga an tangkai dante a sawi. Aizawl DC hian Aizawl District huamchhungah Teachers' Day Award – Zirtirtu 2 hnenah (Life Time Achievement Award) leh School 2 hnenah School Award a hlan bawk a ni. Award dawng zirtirtute chu Pu Lalnunkunga Sailo, Principal (Rtd) Mt. Carmel School leh Pu P. Siamhranga. Mathematics zirtirtu ni thin te an ni a. School Award hi Govt. Mizo High School, Aizawl leh Dawrpui Middle School ten an dawng a ni.

Pu Lalthanzama Addl. Director, School Education, pawhin thusawiin DEC Aizawl District in Zirtirtute Ni lawmna hun buatsaih a nih chu lawmawm a tih thu sawiin, zirtirtu te chu ram rohlu an nih thu te, naupangte hmakhua thui tak ruahman saktu an nih thu te a sawi a. Zirtirtu te chu khawi hmunah leh engtik lai pawha chawimawi phu an nih thu a sawi bawk a ni.

Teachers' Day lawmna hun hi Pu Lalramthianghlima, District Education Officer (DEO) & District Project Coordinator (DPC) Aizawl District chuan kaihruaiin Pu Laltlanliana, President Mizoram Work Education Teachers' Association (MWETA) in hunserh a hmang a. Pu R. Zonunmawia, Dy. District Project Coordinator, Samagra Shiksha Aizawl District in DEC Aizawl District huamchhung chanchin tawi leh hmalakna hrang hrang a tarlang a ni.

Aizawl District huam chhung ah hian Sawrkar (Government) School- 399 (P/S - 203, M/S-135, H/S- 52, HSS - 9); Samagra Shiksha School - 60 (P/S -14, M/S-30, H/S-13, HSS 3); Grant in Aid School - 62 (P/S - 0, M/S-23, H/S- 31, HSS -8) leh Private School - 359 (P/S - 35, M/S-135, H/S- 52, HSS - 9) te an awm mek a. A vaiin School 880 awm mekin, heng school-ah te hian zirlai 1,01,094 leh zirtirtu 6958 an awm mek bawk a ni.