1825/2022-2023
Lunglei 5th Sept. 2022 : 2nd Battalion MAP Luangmual hmuna intuai tharna hun Detoxification & Rehabilitation Camping ni 45 chhung awh chu vawiin khan kharna hun neih niin DIG Southern Range, Lunglei Pu Lallianmawia chuan khuallian niin a hmanpui.

He hun 2nd Bn. MAP Recreation Hall Luangmual a hman hi Pu K. Beihmotaosa, Deputy Commandant, 2nd. Bn. MAP in a kaihruai a, he huna khuallian Pu Lallianmawia, DIG Southern Range chuan sawrkar laipui atanga hmalakna National fund for Control of Drug abuse, Ministry of Finance atanga buatsaih a nih thu sawiin 2nd Bn. huam chhunga ruih hlo leh zuin a tihbuai bakah piantharna kawnga hriatna la nei lote tana intuai tharna hun camping neih zawh theih a ni chu lawmawm a tih thu sawiin, MAP ten ram tana hna an thawhnaah hmasawnna nasa tak a thlen a beisei thu a sawi a, an nunah leh hmelah pawh hmuh theia a lang chu lawmawm a tih thu a sawi a ni. DIG Southern Range Pu Lallianmawia chuan Police ten uniform an haka buaina nei tlat an awm thin chu thil tha lo tak a nih thu sawiin vawiina camp chhuak ten an nihna chu chhungkua leh kohhran tan tangkai zawk a hmanga rinna khuh bo lo tura tangkaipui turin camp chhuakte a chah a, an tihsual tawhin a thinletna tam tak awm theite pawh tuar tlanga an awmna apiangah chanchin tha hriltu ni turin kal khawmte a fuih a ni.

Detoxification and Rehabilitation Camping kharna hunah hian Lunglei SP Pu Rex Zarzoliana leh BCM Pastoral Ministry Dept. Director Rev. Vanlalmuankima pawhin fuihna thu an sawi bakah campers aiawhte pawhin thu an sawi a ni. He camping-ah hian mi 49 in report zingah mi 44 ten camp an chhuak thei a ni.