315/2022-2023

Ṭau thla ni 27, 2022: Vawiin khan Lead Bank Office, Lawngtlai huaihawtin sawrkar laipuiin kut hna thawktute hamṭhat nana bank kal tlanga sum puk theih dan a ruahman, Kisan Credit Card (KCC) loan chungchang Lawngtlai District chhunga a chhawrtu tur mipuite hnena puanzarna, "District Level KCC campaign" chu Lawngtlai DC Conference Hall-ah buatsaih a ni a. Lawngtlai Bawrhsap Dr Andrew H. Vanlaldika chu Khuallian a ni.

Bawrhsap Dr Andrew H. Vanlaldika chuan sawrkarin mipuite hamṭhatna tur leh kut hna thawktute bul ṭanpuina atana a pung (interest) hniam tea rulh theih tur KCC loan a ruahman chu a hmang thiam tan chuan din chhuahpui theih a ni tih sawiin, chhawr tum ngei turin kal khawmte chu a chah a. Hlawhtling tura taimak a ṭul thu leh sawrkar leh bank tan pawha ṭanpui tlaka thawh rim leh loan rulh ṭhat a pawimawh thu a sawi a. Kal khawmte chu department mi thiamte zirtirna ngun taka ngaithla a, an hma lakna turah an thurawn lak nachang hre ṭhin turin a chah a ni.

Lead Bank Office, Lawngtlaia Lead District Manager Pu Lallawmkima chuan hun kaihruaiin, KCC campaign buatsaih chhan a sawi fiah a. "Ran vulh ei zawnna tlak" tih thupui hmangin KVK Lawngtlaia Subject Matter Specialist (Animal Science) Dr Lalṭhazuali'n thu a sawi a, Mizoram Rural Bank, Lawngtlai Branch-a Chief Manager Pu Joseph Lalremruata chuan "KCC AHDF (Animal Husbandry, Dairying and Fisheries)" loan chungchang a sawi fiah a. SBI Lawngtlaia Assistant Branch Manager Pu F. Lalbiaksiama'n "KCC Crops" loan chungchang sawi fiahin, LDM Pu Lallawmkima'n "NPA, CBIL & General Banking" chungchang a sawi fiah bawk a. Zawhna leh chhanna hun hlawk tak hman zui a ni bawk.

KCC loan hi chi hnih - Crop Loan (Ministry of Agriculture & Farmers' Welfare hnuai) leh Animal Husbandry, Dairying and Fisheries (Ministry of AHDF hnuai) a awm a. Kut hna thawktute'n mahni account neihna bank kal tlanga lak theih niin, a pung eng emaw zat chu sawrkarin a rulhsak tur a nih avangin a sum lu (principal) baka mahni rulh ngai chu tlem te a ni.

Vawiina Lawngtlai DC Conference Hall-a KCC campaign buatsaih hi mipuiin an hlut hle a. District level campaign hi Lawngtlai District chhung khaw hrang hrangah kalpui chhunzawm zel tum a ni.

Attachment

  • Loading attachment...