Vawiin khan Lawngtlai District Level Standing Committee for CADC 2018 chu an Chairman Lawngtlai District Election Officer Dr Arun T., IAS, Lawngtlai Bawrhsap hovin a room-ah an thu khawm a. CADC inthlan lo awm tur chungchanga thil tul hrang hrang an sawi ho.

He hunah hian Election Officer Pu Lalrinawma MCS chuan CADC 2018 atana summary revision neih dan tur sawi fiahin, draft E/Roll chu February ni 7, 2018-a tihchhuah a nih tawh thu leh claim & objection neih hnuah final publication chu February ni 28, 2018-a tihchhuah hman tum a nih thu a sawi a. CADC (CCB) Amendment Rules, 2002 Rule 146  (1) (a)-in MDC inthlanah non-tribal tan vote  neih a phal loh avangin, CADC area chhunga non-tribal vote nei zawng zawng chu claim & objection neih chhungin roll atanga paih vek tur a nih thu sawiin, Rule 146 (3)-in mi pakhatin hmun khat aia tama vote neih a phal loh bawk avangin, double enrolment zawn chhuah a, paih vek tur a nih thu a sawi bawk.

Kum 2013 CADC inthlanah khan polling station 63 leh auxiliary polling station 5 a awm a. Auxiliary zinga 3 chu polling station puitlingah hlan kai niin, tun 2018 inthlanah hi chuan polling station 66 a awm tawh dawn a. Voter 1000 chuang awmna polling station 4-ah te auxiliary polling station hawn a ni bawk ang.

Tluang taka inthlan kalpui a nih theih nan inkalpawhna kawng dinhmun pawh he meeting-ah hian sawi ho nghal niin, harsatna a awm loh nan hma lak zel tum a ni.