No.793/2020-2021

Lawngtlai, Tomir thla ni 4, 2020: Vawiin khan Lawngtlai District Level Task Force on COVID-19 chu an Chairman Pi Shashanka Ala, IAS hovin DC Conference Hall-ah an thu khawm a. DLTF member-te bakah, COVID-19 kaihhnawiha mawhphurhna pekte leh Lawngtlai District chhunga pawl hrang hrang ai awhte telin, COVID-19 vanga inkharkhip thawh thumna kalpui dan tur an sawi ho.

Chairman Pi Shashanka Ala chuan COVID-19 avanga inkharkhip thawh thumna, May ni 4 atanga ni 17, 2020 chhunga kalpui chhunzawm dan tura state sawrkar atanga ruahmanna awmte a sawi fiah a. Hemi ruahmanna bawh zui dan tur leh a hlawhtlin theih nana hma lak dan tur hrang hrang te, COVID-19 laka him tura Lawngtlai District chhunga chet lak chhunzawm dan tha ber tur te ngaihtuah ho a ni.

Inkharkhip thawh thumnaah hian inthlah dulna lai awm mah se, sawrkarin zawm tur dan a zamte chu khauh taka ken kawh a ni dawn a. Hemi kawnga sawrkarin dan (ordinance) thar a tihchhuah tlawh chhanin, dan zawm lote chu pawisa chawitir bakah, lung in tantir thlenga hrem theih a ni.

Ram dang nena inrina (international border) pal tlanga luh leh chhuah chu khap chhunzawm zel a la nih avangin Lawngtlai District-in international border a neihte chu uluk taka ven chhunzawm zel a ni dawn a, ramri bul khuaa mite pawh ram dang atanga lo lut ru an awm chuan lo mikhual lo va, thuneitute hnena thlen zel tura hriattir an ni.
Tul bik thilah lo chuan state dang, district dang leh district chhunga mipui vantlang chet vel pawh phal a ni rih lo va. Tul bik leh rikrum thila veivah mamawhte chuan Village Level Task Force emaw, DC office atang emawin phalna lak hmasak tur a ni a. Pawn chhuak tur reng rengin tha taka hmui tuam zel tur niin, sawrkar pawimawh leh DC-in phalna a pek ni lo lirtheite chu an registration number azirin a ni inchhawka tlan tur a ni a, khualzin phur lirtheite pawh an phurh theih zat pangngai zatve chauh phurh phalsak rih an ni.

Inkharkhip thawh thumna kalpui chhung hian zirna in, biak in leh vantlang puipunna hmun hrang hrangte chu khar chhunzawm a la ni rih dawn a. Damdawi zawrhna, ran damdawi zawrhna leh inentirna hmun chu eng tik lai pawhin an inhawng thei ang a, a bak dawr dang reng reng chu a ni kar thlaka inhawn phalsak niin, an inhawn chhawk dan tur chu VLTF-te'n ruahmanna an siam ang. Dawr hi tlai dar 5 thleng bak hawn phal a ni lo.

DLTF chuan inkharkhip thlah dul a nih avang hian COVID-19 hi a hlauhawm ta lo tihna a nih loh avangin mipuite chu fimkhur reng tur leh tul bik tak tak lovah chuan pawn chhuah tum lui lo turin a ngen a. Inkharkhip thawh thumna kalpui chhung hian khawlaia mihring inhnaih chilh loh (social distancing) chu zawm zel tur niin, mi panga aia tam hmun khata awm khawm phal a ni lo va, hemi zawm lote chu pawisa chawitir theih an ni. Zan dar 7 atanga zing dar 4 inkarah COVID-19 kaihhnawiha duty leh DC-in phalna a pek ni lo tu mah khawlai chhuah phal a ni lo bawk.