No.386/2020-2021

Vawiin khan Lawngtlai District Level Task Force on COVID-19 chu an Chairman Pi Shashanka Ala, IAS hovin DC Conference Hall-ah an thu khawm a. COVID-19 vanga inkharkhip kalpui mek dan leh kalpui chhunzawm zel dan tur an sawi ho.

Chairman Pi Shashanka Ala chuan COVID-19 avanga inkharkhip kalpui mek chu Lawngtlai District-ah tluang taka a la kal zel thu tar langin, ei leh bar lak khawm leh sem chhuah chungchangah te, dan leh thupek ken kawh leh inkharkhip kaihhnawih thil hrang hrangah harsatna lian tham thleng hriat tur a awm lo chu lawmawm a tih thu a sawi a. Sawrkar official-te, khua/veng hrang hrang Village Level Task Force te, tlawmngai pawl hrang hrang, kohhran leh mipuite inpekna leh thawhpuina avangin lawm thu a sawi.

Ram chhunga inkharkhip thawh khatna chu April ni 14, 2020 khan zovin, sawrkar laipui chuan May ni 3, 2020 thleng inkharkhip hi kalpui chhunzawm turin a rel a. Hemi kalpui dan tura sawrkar laipui Ministry of Home Affairs ruahmanna chu Chairman-in sawi fiahin, chumi zulzui chuan April ni 20 atanga kal tur a nih thu a sawi a. Chumi hma zawng chu inkharkhip kalpui mek chu Lawngtlai District-ah a ngai anga kalpui chhunzawm tur a nih thu a sawi.

Inkharkhip kalpui zel turah khualzin veivah khapna te, mipui pun khawmna ang chi tih loh te, mahni invawn fai, kut sil fai that, mi dang nena inhnaihchilh loh tih te chu kalpui chhunzawm zel tur a ni a. Vantlang hmuna chil chhak khap a nih bakah, vantlang hmun leh hna thawhna hmunah te hmuihmai tuam (facemask hman) ngei ngei tawh tur a ni.

Agriculture leh a kaihhnawiha kut hna thawktute'n sawrkarin fimkhurna dan a zamte zawm chungin hna an thawh remtih a ni a, chutih rual chuan VLTF emaw, Incident Commander emaw atangin phalna leh hriatpuina lak hmasak tur a ni. Anganwadi Centre te'n chaw tha an sem thinte chu ina pek chilhin ni 15 chhungin vawi khat an sem tawh dawn a, kum upa/hmeithai/zalenna sualtu te'n hamthatna an dawn thin pawh pek chhuah tur a ni.

MGNREGA hnuaia ni za inhlawhna thawh chhunzawm theih dan tur pawh ruahman niin, fimkhur takin thawh a ni dawn a. Pradhan Mantri Garib Kalyan Yojana hnuaia mi retheite hamthatna atana sawrkar ruahmanna - PMUY beneficiary-te'n April atanga June thla thleng a thlawna thla tin gas bur khat zel an dawn tur leh PMJDY bank account nei hmeichhiate'n thla thum chhung thla tin ? 500 zel an dawn turah harsatna a awm loh nan hma lak mek a nih thu pawh tar lan a ni.

District Hospital thuneitute atangin sawrkar thupek angin COVID Care Centre leh Dedicated COVID Centre te ruahman mek a nih thu ngaihthlak a ni a. Chief Medical Officer atangin Lawngtlai District-a home quarantine zawng zawng mi 495 zinga mi 4 tih loh chuan an quarantine hun hmang zo tawhin, DLTF atangin certificate felfai tak nen chhuahtir an ni tawh thu leh, facility quarantine-a awm mi 24 pawh harsatna nei awm lova chhuahtir vek an nih tawh thu tar lan a ni bawk.

Ni tin mamawh dawr hawn leh enpui chungchangah Lai Autonomous District Council chu licence petu an nih angin an kutah dah a ni a. An ruahmanna hnuaiah felfai takin mipui ni tin mamawh pek theih beisei a ni. COVID-19 hri leng mek laka Lawngtlai District mipui an him theih nan DLTF chuan mipuite chu thu awih taka sawrkar thawhpui chhunzawm zel turin a ngen a ni.