No.385/2020-2021

Sawrkar Laipui, Ministry of Home Affairs-in COVID-19 hripui darh zel tur venna atana hmalak dan tur thupek April ni 15, 2020 a tichhuah dungzuiin Mizoram Sawrkarin he inkharkhip thawhhnihna kalpui dan tur inkaihhruaina thar a tichhuak a. Vawiin khan State Level Task Force on COVID-19 chuan an Chairman Pu Lalnunmawia Chuango, Mizoram Chief Secretary hovin Secretariat Conference Hall, MINECO ah he ruahmanna hi an duang a ni.

He inkaihhruaina thar ang hian International boundary leh Inter-State boundary chu khar chhunzawm zel a ni ang a. Bairabi leh Vairengte kaltlang kawngpuite erawh chu phalna nei bungraw phur lirtheite tan hawn chhunzawm a ni ang. Mipui zin veivahna lirthei erawh chu khap tlat a ni. Ramri (International leh Inter-State) ah khauh (strict) taka duty chhunzawm zel a ni ang.

State pawn atanga bungraw lakluh theih zingah nitin mamawh (essential commodities) te chu phalna hranpa lak ngai lovin lak luh theih a ni ang a. Amaherawhchu, SDO(C), Vairengte emaw SDC, Bairabi hnenah declaration (prescribed form hmangin) an thehlut ngei ngei tur a ni. Nitin mamawh (essential commodities) ni lo, ei leh bar zawnna leh hmasawnna atana mamawh bungrua - steel, cement, brick, balu, insakna bungrua ilo - la lut tur te erawh chuan hemi atana dilna form siam hmangin Home Department phalna an la hmasa tur a ni.

Mizoram chhunga thilsiam, vulh leh tharchhuah te chu Mizoram chhunga hmun hrang hrangah bungraw chet tanna tur district a Deputy Commissioner te phalna-in thawn chhuah theih a ni ang a.Bungraw lakluh leh thiar chungchang atan hian mobile application siam a ni dawn a, peihfel a nih veleh heng ruahmanna te hi a tul anga tih danglam a ni ang.

Kharkhipna hnuaiah Social distancing zawm chungin bialtu Local Task Force te hriatpuina in phalna hranpa lak ngai lova kalpui theih zingah a hnuaia mite hi telh a ni

1.Hospital, nursing home, clinic, laboratory, vaccination, OST centre, ART centre, ambulance service, blood bank leh damdawi dawr.
2. Veterinary hospital, dispensary, clinic, zoo, hatchery leh vaccination.
3. Agriculture, horticulture, sericulture, animal husbandry leh fisheries hna leh a kaihhnawih thlaichi, leitha, ranchaw leh hmanraw dawr te.
4. Bank, insurance, ATM leh postal service, blood donation camp/ service.
5. Kohhran office a hnathawk pawimawh zual kohhran office hotu berin lehkha a siamsak te.
6. Power & electricity, water supply (mimal tui chawi te huamin), sanitation & solid waste management (hmunphiat leh bawlhhlawh paih te huamin), telecommunication, internet service, broadcasting leh cable service.
7. Petrol/Diesel filling station, LPG.
8. Fair Price Shop/ ration dawr.
9. Nau pai, nausen pawmlai leh naupang te hnena nutrition (chaw tha) sem.
10. Bawnghnute sem leh lakkhawm.
11. MGNREGS, MPLAD leh MLALAD hnuaia hnathawh.
12. Print leh electronic media, leh chanchinbu sem.
13. Bungraw load leh unload hna.

Public park, picnic spot, movie theatre, gym, community hall, restaurant, shopping complex, mall leh intawllenna hmun zawng zawng chu khar chhunzawm tur a ni a. Zirna in leh Sakhaw biakna hmun te chu khar chhunzawm zel a ni ang. Board exam la zawhfel lohte erawh chu an zawh fihlim theih dan tur Sorkarin a ruahman angin kalpui a ni ang. Mithi vuina ah mi 20 (Sawmhnih) aia tam punkhawm phal a ni lo.

Inter-State leh inter-district ah mipui zin leh veivah khap tlat a ni a. Chhiat tawh thil ah thisen zawmpui chhungkaw hnai zual bik leh damlohna avanga loh theih loh thilah chuan an awmna district Deputy Commissioner hriattirin an awmna Local Task Force te phalna in State chhunga hmun dangah kal theih a ni ang.

Mipui vantlang tana inkhuahkhirhna hriattur te hetiang hian siam a ni a :-
1. Lockdown chhung hian mi 5 (panga) aia tam punkhawm khap tlat a ni.
2. Tul bik thil - damdawi lei, buhfai/ration lak, chawhhmeh leh ei bar lei tura chhuah lawk - tih loh ah chuan tumahin mahni in leh compound an chhuahsan tur a ni lo.
3. Loh theih loh thil a nih loh chuan, kum 65 chin chunglamte leh taksa hriselna lama harsatna neisate chu inah inkharkhip vek tur a ni.
4. Pawn chhuak tur leh damdawi in a kal tur reng reng chuan (face mask leh hmanraw dang hmangin) hmai an tuam ngei tur a ni.
5. Vantlang hmun leh dawra kalte chu metre khat tala inhlata awm tur a ni.
6. Phalna neia dawr hawnte chu tlai dar 5:00-ah khar vek tur a ni.
7. Khawtlanga inkharkhipna kalpui chungchangah hian LLTF/VLTF te chu an bial chhung theuhah an hmalaknate chhunzawm tura beisei leh ngen an ni a, an kalphung tur chu Disaster Management & Rehabilitation Department in Circular No.B.13021/101/DMR-2020 dated 25.03.2020 hmanga inkaihhruaina a chhuah, “Standard Operating Procedure (SOP) for Local/Village Level Task Force” angin hma lak tur a ni ang.
8. LLTF/VLTF member leh volunteer zawng zawng te mcovid-19 mobile application a in register vek tura beisei leh ngen an ni.

Health services, Police, home guards, civil defense, fire & emergency services, disaster management, civil aviation, prisons, excise & narcotics, municipal services, forest field works, PHE, P&E te chu a pangngaiin (full strength in) an kal ang. Sorkar office dang– secretariat, directorate, district administration leh field office dang te hawn an ni ang a. Group A & B officer te chu dan pangngaiin office kal vek tur a ni. Group C & D staff te erawh chu hmun thuma thena hmun khat zelin an in kal chhawk ang. Secretary, Head of Department emaw Head of Office ten inkalchhawk dan tur an ruahman ang. A tul dan a zirin Group C & D staff te hmun thuma thena hmun khat aia tam pawh kal turin an ruahman thei ang. Office chhungah phalna la hmasa lovin pawnlam mi kal phal a ni lo. Hemi atan hian phone in emaw an hmuh duh te phalna an la phawt tur a ni.

Hmasawn nana hnathawh tul - retaining wall/drain/kawng siam, building sak, kawng laih, leidawh te leh chutiang kawnga hmalakna - te chu hna  awmna district DC te remtihna la in thawh phal a ni a. Heng hnate hi ram chhunga awm sa labour te chauh ruai a thawh tur a ni.

Lo neitu leh huan neitute, ran vulhtute, sangha dil neitu te leh a thawktute chu phalna hranpa lak ngai lovin an hna thawh phalsak an ni. Hmun khata mi 5 (panga) aia tam awmkhawm erawh chu khap a ni. Electrician, plumber, mechanic, thing leh cement mistiri leh helper-te chu an hnathawhna Village/Local Task Force-te hriatpuina in hnathawh phalsak an ni.

DC phalna in quarry a lung lak, block/ brick siam, rawra her leh chhut leh thingzai khawl (saw mill) a thingzai theih a ni ang. DC phalna in courier service, e-Commerce leh home delivery service hmanga nitin mamawh, a bikin ei leh in tur, damdawi leh a kaihhnawih thil pe chhuak tu ten an hna an thawk thei ang.

Hmunkhata mipui pungkhawm tur ven nan bazarpuia thlai leh thildang zawrh chu khap chhunzawm a ni a. Chutihrualin, mipui mimirin awlsam taka thlai leh chawhmeh an hmuh theih nan  veng hrang hrangah leh hmun tam zawkah chawhmeh lei theihna tur DC tinin VLTF/LLTF ten an lo enpui turin ruahmanna an siam ang.

Heng tarlan takte hi vawiina inkaihhruaina tihchhuah zinga langsar leh pawimawh zual thlur bikte a ni a. Sawrkarin dan anga he inkaihhruiana a tihchhuah hunah chipchiar leh famkim zawka tihchhuah nawn leh a ni ang.