Lawngtlai District Monitoring Committee on Accessible Election (DMCAE) chu vawiin khan an Chairman, Lawngtlai District Election Officer Pi Shashanka Ala, IAS hovin Lawngtlai DC Conference Hall-ah an thu khawm.

Pi Shashanka Ala chuan ram hruaitu inthlan buatsaih a nihin, khua leh tui vote nei tawh phawt chuan harsatna awm lova vote an thlak vek theih nan mi tin ban phaka inthlanna buatsaih a tul tih sawiin, vote nei thar tir, kum upa leh pianphunga rualbanlote'n harsatna nei lova vote an thlak vek theihna tur ngaihtuah chu DMCAE mawhphurhna leh tih tur a nih thu a sawi a. Chumi kawngah chuan hma sawnna a awm theih nan inthlan neih zawh taka an tawnhriatte hmanga tih dan tha zawk rawt chhuak turin member-te a sawm a ni.

He thut khawmah hian Election Officer Pu Lalremruata Sailo chuan inthlan neih zawh taka an tih dan tha leh zawngchhang tlak nia a hriatte tar langin, nikum kum tawp lam atanga Lawngtlai District chhunga MLA, MP, VC leh MDC inthlan buatsaih zawh takah te tlawmngai pawlte puihnaa kum upa leh rualbanlote vote thlak tura hruai an nih dan te; kohhran hruaitute zirtir a, biak in hrang hranga vote thlak pawimawhzia leh vote thlak tura sawmna puantir a nih dan te; a mamawhte awmna polling station-a wheelchair chhawp a nih dan te leh; vote nei thar leh rualbanlote hnena vote thlak tura sawmna lehkha thawn vek a nih thu te a sawi.

He hunah hian Lawngtlai khawpui chhung leh District chhung hmun danga polling station pan harsa zualte mipui awlsam zawk nana sawn rawtna te sawi ho a ni a. Lawngtlai-III polling station chu voter 1200 chuang an awm avanga then hran a nih tawh thu leh, hmun remchang zawk, CYLA Hall chu polling station-a hman theih a duhawm thu te; Lawngtlai-IV, Council Veng leh Bazar Veng leh hmun thenkhat danga polling station te pawh kum upa leh rualbanlote tana pan harsa thei a nih avanga sawnna ngaihtuah a tul thu te sawi chhuah a ni a. Polling station-te chu mipui nawlpui piah lamah, kum upa leh rualbanlote ngaihtuah ran chunga panna nuam leh remchang zawka dah tura hma lak chhoh zel ni se, tih a ni.

Lawngtlai DMCAE-ah hian Chairman-ah DEO niin, PwD Nodal Officer chu Member Secretary a ni a, member-ah EO, DEO (Education), DPO (SWD), DIPRO, PwD Icon, SVEEP Icon, NGO hrang hrang President theuh leh political party hrang hrang President theuh te an ni.