No.2767/2021-2022
Aizawl Khuangchawi thla ni 28, 2021: Vawiin khan Lawngtlai District Steering Committee on Food Safety chu an Chairman, Lawngtlai Bawrhsap Dr Andrew H. Vanlaldika hovin a office chamber-ah an thu khawm a. He thut khawmah hian District Administration, Police, Health Department, DRDA, LADC Land Revenue & Settlement Department, Legal Metrology leh I&PR official-te, VC Association leh Merchant Association ai awhte an tel a ni.

Chairman Dr Andrew H. Vanlaldika chuan ei in thianghlim pawimawhzia sawiin, Lawngtlai District chhunga thil zuarte'n ei tur thianghlim leh hrisel chauh an zawrh theih nan hma lak a tul tih a sawi a. Ei in thianghlim tawk lo chu taksa tan tur chi khat a ni a, ei tirhah taksaah chhiatna thlen nghal lo mah se, khuareiah taksain a chhiatpui thin avangin ei tur kaihhnawihah chet thianghlim leh fimkhur a pawimawh hle a ni, a ti.

He hunah hian Lawngtlaia Assistant Drug Inspector Pu P. Laltlanzova'n Food Safety and Standards Act (FSSA), 2006 chungchang leh mipuiin ei tur taksa tana him chiah an ei theih nana sawrkarin dan leh inkaihhruaina a siam hrang hrangte a sawi fiah a. Lawngtlai District-a mipuiin bazar leh dawr atanga ei tur an lei thin, hmun dang atanga lak luh leh tualchhunga siam chhuahte danin a phut anga a him chin leh danin a phal chin chauh zawrh a nih theih nana hma lak dan tur hrang hrang sawi ho zui a ni.

Food Safety and Standards Act, 2006 hi India ramah mihring tana ei leh in tur tha, him leh thianghlim siam chhuah leh mipui hnena pek a nih theih nana dan siam niin, August ni 5, 2011 atanga hman tan a ni a. He dan hnuaiah hian ei tur siamna, vawn thatna leh zawrhna hmun endik te, ei tur siam chhuah leh zawrhte a that leh that loh enfiah te kalpui thin a ni a. India rama ei leh in siamtu leh zuartu zawng zawng (a siamna hmunpui, restaurant, thingpui dawr, chhang siam, catering, nepnawi zuar, dawr, rantalh, adt.) chuan Food Safety and Standards Act, 2006 hnuaiah phalna (licence) an nei hmasa vek tur a ni a. Dan bawhchhia (licence nei lo emaw, ei tur thianghlim lo leh him tawk lo zuar emaw) an awm chuan man a, hrem leh an thil siam tihchhiat theih a ni.

Lawngtlai District-ah he dan hi mipuiin an hriat chian theih nan zau taka inzirtirna kalpui hmasak ni se, tih a ni a. November, 2021 chhungin Lawngtlai khawpuia ei leh in siamtu leh zuartute leh tlawmngai pawlte tan awareness campaign buatsaih ni se tih niin, veng chhung tlangau leh thuziak tar hmang te'n inzirtirna hi kalpui ni bawk se, tih a ni.

Vawiin thut khawmah hian Lawngtlai District-a mipui ei atana ei leh in siam chhuah, lak luh leh zawrhte chu a thianghlimna leh himna thu-ah a dinhmun hriat chian nan a theih ang anga hmunpui lama enfiah tura thawn thin ni se, tih a ni a. Ei leh in siamtu leh zuartute'n dan anga an kalpui theih nana District Council-a a kaihhnawih thuneitute leh state-a a kaihhnawih department-te nena hma lak ho dan turte pawh sawi ho a ni.