Vawiin khan Lawngtlai District Task Force Immunisation chu Lawngtlai DC Conference Hall-ah an Chairman, Lawngtlai Bawrhsap Pi Shashanka Ala, IAS hovin an thu khawm a. Lawngtlai District-ah kim tak a hri danna pek a nih theih nan ruahmanna an siam.

DTFI Chairman Pi Shashanka Ala chuan hriselna chu ram hmasawnna bul leh innghahna a nih avangin thahnem ngai taka hma la turin thawktute chu a chah a. Lawngtlai District chhungah tlawh pawh zung zung harsa deuh awm mah se, hri danna la turte'n kim taka  an lak vek theih nan tan lak tlan a ngai a ni, a ti.

Vawiin meeting-ah hian District Immunisation Officer Dr S. Thaizi chuan Intensified Mission Indradhanush (IMI) kalpui meka Lawngtlai District dinhmun a tar lang a. Hun bi tiam neia Health Department te'n hri danna an pek thin Routine Immunisation dinhmun thlir let niin, District chhunga damdawi in hrang hrang atangin report ngaihthlak a ni a. Hunbi tiam siama hri danna pek thinin a tuam lohte kim taka tuam chhuah an nih theih nan thal chhungin hma lak ni se, tih a ni a. Hma lakna a hlawhtlin theih nan block tina BDO-te chu an huam chhungah tih tur tul pawimawh te lo bawhzui tura tih an ni.

Meeting-ah hian Lawngtlai District chhunga damdawi in hrang hrang ai awhte, Block Development Officer te, Social Welfare Department lam leh Health & Family Welfare Department-a he lam kaihhnawiha thawktute an tel.