No.1594/2020-2021

Lawngtlai, Nikir thla ni 2, 2020: Vawiin khan Lawngtlai District Water & Sanitation Mission (DWSM) chu a tum khat nan an Chairman, Lawngtlai Bawrhsap Pi Shashanka Ala, IAS hovin DC Conference Hall-ah an thu khawm a, hma lakna tur ruahmanna hrang hrang an sawi ho.

State leh District Water & Sanitation Mission chu tun hnai khan din thar niin, tun hi Lawngtlai DWSM hi an vawi khat thut khawmna a ni a. Public Health Engineering Department (PHED) hnuaia thingtlang mite tana tui thianghlim hnianghnar tak ngaihtuah leh fai leh thianghlim taka an awm reng theih nana hma lakna en zui tura din a ni.

Chairman Pi Shashanka Ala chuan member kal khawmte hnenah lawm thu sawiin, Lawngtlai District thingtlang khuate'n tui thianghlim hnianghnara an hmuh theih nana ngaihtuahna seng turin a chah a. DWSM thut khawma annual plan leh action plan thlir ho tur felfai tak an buatsaih avangin Lawngtlai WATSAN Division PHED hotute chu a fak bawk.

Member Secretary, PHED Lawngtlai WATSAN Division-a Executive Engineer Er Netralal Jaisi chuan Jal Jeevan Mission (JJM) hnuaia kum 2024 hma ngeia thingtlang in tina tui connection pe kim hman tura hma lakna kal mek chungchang sawi fiahin, hmachhawp hrang hrangte a tar lang a. Sub-Divisional Officer Er T. Mangliandinga chuan JJM hnuaia kum 2019-2020 chhunga hna thawh mek dinhmun leh kum 2020-21 atana action plan leh 2024 thlenga annual plan tar langin, a sawi fiah nghal bawk.

JJM hnuaia thingtlang in tina tui connection (Functional Household Tap Connection) pek turah hian kum 2019-20 chhungin Lawngtlai WATSAN Division hnuaia khaw 35-a chhungkua (household) 4788 tinzawn niin, FHTC pek fel tawh zat hi chhungkaw 1093 a ni a. Kum 2020-21 atan khaw 46-a chhungkaw 7191 hnenah FHTC hi pek hman tum niin, hemi atana action plan pawh peih fel tawh a ni a. Hei hi a hlawhtlin theih chuan a pumpuia FHTC tih kimna hi kum 2020-21 thleng chuan khaw 81 a ni dawn a ni.

JJM hnuaia ruahman lawk ang chuan kum 2021-22 chhungin khaw 37, kum 2022-23 chhungin khaw 30 leh kum 2023-24 chhungin khaw 10 tuam zovin, a pumpuiah khaw 158-a chhungkaw 25096 hnenah FHTC hi pe fel thei tura ruahman a ni.

Vawiin Lawngtlai DWSM thut khawmah hian District Action Plan (2020-21) leh Annual Plan (2020-2024) chu pawm a ni a. Kalphung pangngai angin Lawngtlai WATSAN Division hnuaia JJM hna kalpui turah hian Lawngtlai leh Chawngte WATSAN Sub-Division-a SDO-te chu an bial chhunga Work Manager atan ruat nghal an ni bawk.