No.1593/2020-2021

Vawiin khan SAD Conference Hall, MINECO ah sawrkar hotulian te inhmukhawmin COVID-19 in Mizoram a chenchilh mek chungchangah inrawnkhawmna an nei. He inrawnkhawmna hun hi Health Minister Dr. R. Lalthangliana’n a kaihruai a, Home Minister Pu Lalchamliama, Supply Minister Pu K. Lalrinliana leh I&PR Minister Pu Lalruatkima, Medical Operational Team Chairman Dr. Z.R Thiamsanga bakah Chief Secretary Pu Lalnunmawia Chuaungo leh sawrkar hotulian thahnem tak an tel a ni.

Health Minister chuan COVID-19 vanga damlo pakhat kan neih kan enkawl dam tawh a, hun engemaw chen he hripui lakah hian kan him tawh mek laiin kan beiseiloh thil kan tawng leh ta a, engtin nge hma kan lak zui ang tih kan ngaihtuah ho a tul a ni a ti a. Mipuiten kan dawnsawn dan thlirin kan la hrethiam tawklo niin a lang a, damlo hmuhchhuah tharte chu khawtuala hri kai nilo, ram pawn atanga rawn kai an ni a, Mizoramah an rawn luhin quarantine centre ah khung nghal an ni a, pawn lam mi nen inhnaihpawh a an awmloh avangin engmah hlauhthawn tur a awm lo a ni a ti a, damlote pawh mithiamten uluk taka kalphung felfai taka duan sa hmangin an enkawl dawn a, mipuite chi-ai lo tura a duh thu sawiin COVID-19 chungchanga inzirtirna leh inkaihhruaina awmze nei zawka kan kalpui a tul a ni, a ti.

Home Minister Pu Lalchamliana pawhin COVID-19 nena kan chen dun loh theihloh tawh avangin thiam taka chen dun pui kan zir a ngai tawh niin a lang a, mipuite chu COVID-19 hlau lo, mahse fimkhur tak si tura ziritr tam a ngai a ni, a ti a. He natna hi tuman an hrechiang lova, mithiamte pawhin an zirchian mek a nih avangin sawrkarin ruahmanna a siam, a bikin Social Distancing inkaihhruaina te mipuiin zawm hram hram thin se a duh thu a sawi a, PM Cares Fund atang sum dawn beisei a nih thu a sawi bawk.

Supply Minister Pu K. Lalrinliana pawhin COVID-19 chungchanga tih tur leh tihloh tur zawng zawngte mipuiten an hriat chian a ngai a ni tih sawiin Bairabi a buhfai load leh unload tu labour te pawh thinhrik leh sawithaih an ni, a ti a, hei hian harsatna engemaw chen min siam a, kan fimkhur dan turte, a kai theih leh kai theihloh dan te inzirtir tam a pawimawh hle a ni, a ti bawk.

I&PR Minister Pu Lalruatkima chuan tangkhang lo haw te Mizorama an chhung leh khat, thian thate nen hlim taka an lo haw kan duhsak rualin a theih ang angin social distancing kalpui zel thin se a duh thu a sawi a, COVID-19 chungchangah thu thar a awmin sawrkar ruahmanna ngaichang lova social media ah thu thehdarh nghal zung zung a ni thin hian buaina a thlen fo thin a, sawrkar thuneitu ten uluk takin an ngaihtuah a, tihdan tur an ruahman a, a him tawk ni a an hriat hunah a puangzar tura ruat ten an puang thin a ni tih a sawi a, mipui ti chi-ai leh rilru tibuailo thei tur zawnga social media hmang turin mitinte a ngen a ni.

Chief Secretary Pu Lalnunmawia Chuaungo chuan nizan lamah Kolasib-a quarantine facility pakhat awm mi 11 leh ZMC a damlo enkawl lai mek pakhat chu COVID-19 an positive a ni tih hriat a ni a, protocol pangngai ang chuan quarantine facility ami te hi Kolasib-a Covid Care Centre ah enkawl mai tur a nih laiin tunlai boruakah Kolasib District lam hi mikhual lo haw buaipuiin hun leh tha an seng nasa a, Zoram Medical College (ZMC) lamah enkawl tura lak mai ni se tha tih a ni a, nizan khan phurh chhoh nghal niin tukin dar 5:00 vel khan tluang takin ZMC an thleng tih a sawi a, COVID-19 vei te hi an taksa ah engmah harsatna an nei lova, thalai la hrisel rual vek an ni bawka, tumah ICU a dah ngai emaw, ventilator hmanga thawk tir ngai an awmlo tih a sawi.

Chief Secretary chuan Mumbai atanga rawn haw mekte zingah vanduaithlak takin nula pakhat, Keifanga haw tur chu rel atang a tla thla a, nizan khan a boral a, New Jalpaiguri atanga Mizorama a ruang rawn hawn dan tur pawh ruahman a ni a ti a, hetih rual hian Badarpur leh Lumding inkarah rel kawng nasa takin a chhia a, a siam that nan ni engemawzat a ngai dawn a, chuvang chuan Mumbai atanga lo haw mekte pawh vawiin chawhma lama Bairabi thleng tura ngaih pawh an rawn thleng thei dawn ta lo a, Guwahati atanga Bus a phurh haw dan tur ngaihtuah a ni a, Assam sawrkar nen indawr mek niin Mizoram ramri, Vairengte thlengin Assam sawrkar hian an rawn thlah theih kan beisei a ni, a ti bawk. Heng senso hi Mizoram sawrkar tum vek tur a ni.

Vawiin sawihona ah hian COVID-19 swab sample endikna khawl RT-PCR pali neih thuai beisei a nih thu tarlan a ni a, Viral Transport Media (VTM) 2550 neih a nih thu leh reilote ah 10000 chah thlen beisei a nih thu tarlan ani bawk. Zoram Medical College-ah ICU khum 36 (makeshift ICU telin) leh ventilator 16 neih a nih thu leh, Isolation Ward khum 28 awmna ruahman a nih thu tarlan niin COVID-19 vei zawng zawng ten ICU leh Ventilator an mamawh vek ngai lova, tun dinhmunah chuan inpuahchahna a tha tawk rih ni a a lan thu tarlan a ni.

Vawiin sawihona ah hian COVID-19 chungchang, nihphung leh a laka kan inven dan turte leh a kaihhnawih thil pawimawh dang chi hrang hrangte mipuite bakah Local/Village Level Task Force ten chiang taka an hriat a tul thu sawilan a ni a, ramchhung hmun kilkhawr ber thlenga inzirtirna mumal zawk kalpui na pawimawh tih tarlan niin, I&PR Minister kaihhruaina hnuaiah I&PR department leh H&FW department ten ruahmanna an siam dawn a ni.