No.1961/2021-2022
Aizawl Thlazing ni 23, 2021: Vawiin khan Lawngtlai District Level Task Force on COVID-19 (DLTF) chu Additional Deputy Commissioner Pi Marilyn Rualzakhumthangi hovin Lawngtlai DC Conference Hall-ah an thu khawm a. COVID-19 hri leng laka him nana state sawrkar ruahmanna zulzuia Lawngtlai District chhunga chawlhkar khat chhung (ni 30.08.2021, Thawhtanni thleng) inkhuahkhirhna kalpui dan tur an rel.

Vawiin meeting hi Lawngtlai East bialtu MLA, Agriculture Development Board Vice Chairman Pu H. Biakzaua chuan telpuiin, Lawngtlai District-a hri kai zat an kiam hlei thei lo chu sawrkar pawhin a ngaihven hle tih sawiin, theih tawpa tan lak zui zel a tul thu a sawi a. Hri dona kawnga thawktu zawng zawngte inpekna chu lawmawm a tih thu a sawi bawk.

Lawngtlai District Chief Medical Officer Dr LP Malsawma chuan Lawngtlai District-ah COVID-19 hri danna (vaccine) first dose la tawh 44% awmin, second dose la tawh 10% an awm thu a sawi a. Inkal pawhna harsat vang te, a bikin District chhung khawthlang lamah vaccine la duh lo an tam avang te'n harsatna an tawh thu a sawi.

Vawiin meeting-ah hian state sawrkarin Mizoram puma hman tur inkhuahkhirhna a duan sa bakah, District chhunga inkhuahkhirhna kalpui dan pangngai chu tlem siam danglam hreta chawlhkar khat chhung kalpui leh ni se, tih a ni a. Lawngtlai khawpuiah chuan Dawr zawng zawng zing dar 6:00 atanga chawhnu dar 3:00 thleng an inhawn remtih niin, khawpui chhung veng 12 zone thuma thente chu a ni inchhawkin in-bazar chhawk leh ni se, tih a ni.

Hri kai dinhmun a hniam theih loh avang leh Covid Care Centre (CCC)-in a zo lo lam a nih tawh avangin, veng hrang hrang Community Covid Care Centre (4C) la nei lote chu official-te'n kal chilhin, veng thuneitute nen 4C buatsaih turin ruahmanna siam ni se, tih a ni a. Hna thawh chungchang leh inkhuahkhirhna dangte chu kal dan pangngai tihdanglam awm lovin, infiam mite'n fimkhur taka hri laka invenna kalpui chunga inkaihhruaina dan hnuaia sports practice an neih chu remtih thar a ni.

Lawngtlai DLTF meeting chuan District mipuite chu hri laka invenna ngai pawimawh deuh deuh tura chahin, tul pawimawh tawp a nih loh chuan pawn chhuak lo turin an ngen a ni.