No.2625/2020-2020

Vawiin khan Lawngtlai District Level Task Force on COVID-19 (DLTF) leh Lawngtlai khawpui chhunga VLTF ai awhte, quarantine facility nodal officer-te leh zonal officer-te chu DLTF Chairman, Lawngtlai Bawrhsap Dr Andrew H. Vanlaldika, MCS hovin DC Conference Hall-ah an thu khawm a. COVID-19 hri leng darh zel tur khuahkhirh a nih theih nana July thla chhunga Lawngtlai District chhunga hma lak dan tur an sawi ho.

Chairman Dr Andrew H. Vanlaldika chuan COVID-19 hri leng vanga inkhuahkhirhna chu mimal eizawnna leh mipuite harsatna sut kian a nih theih nan Mizoram sawrkarin thlahdul deuh tura ruahmanna a siam thu sawiin, July ni 1 atanga July ni 31, 2020 chhung atana sawrkarin inkaihhruaina a siamte a sawi fiah a. Hemi ruahmanna bawh zui dan tur leh hemi chungchanga Lawngtlai District chhunga chet lak chhunzawm dan tur te ngaihtuah ho a ni.

Inkhuahkhirhna chu state sawrkar ruahmanna zul zuiin Lawngtlai District chhungah pawh kalpui ni se, tih a ni a. Sawrkarin inkaihhruaina a duante chu tha taka zawm a nih theih nan mipuiah a tam thei ang ber puanzar niin, sawrkar leh VLTF atanga uluk taka kenkawh ni se, tih a ni.

July thla chhung atana inkaihhruaina ang chuan, sawrkar office-te chu a pangngaia kal chhunzawm tawh tur niin, dawr, sumdawnna hmun leh eizawnna hmun dangte pawh fimkhurna dan zawm chungin a pangngaia hawn theih a ni a, damdawi dawr tih loh dawr dang zawng chu tlai dar 6:00 hmaa khar vek tur a ni thung. Khaw kar kawnga khualzin phur lirthei leh khaw chhunga sumdawng lirtheite pawh fimkhurna dan zawm chungin a pangngaia tlan phalsak an ni bawk.

Zirna in leh training institute chu khar chhunzawm tur niin, biak ina mipui inkhawm pawh la tih rih loh tur a ni a. Zing tawngtai inkhawm, inneih inkhawm leh lawmna, mitthi vuina, lungphun, anniversary, politics leh pawl thila kal khawmnaah mi 50 aia tam pun khawm khap niin, infiamna leh lehkhabu tlangzarhnaah mi 25 aia tam pun khawm khap a ni a, tournament leh puipunna dang chu huaihawt khap rih a ni.

Khawlaia mihring inhnaih chilh loh (social distancing) chu zawm zel tur a ni a. Zan dar 7:30 atanga zing dar 4:30 inkarah COVID-19 kaihhnawiha duty te, phaia atanga bungraw lo lut hlan thlak te, chhiat tawh thil leh medical emergency-a DC-in thuneihna a pek zul zuia VLTF-te'n phalna an pek ni lo tu mah khawlai chhuah phal a ni lo.

Pawn chhuak tur reng rengin tha taka hmai tuam zel tur a ni a. Lawngtlai DLTF chuan District mipuite chu fimkhur reng tur leh tul bik tak tak lovah chuan pawn chhuah tum lui lo turin a ngen a ni.