No.2624/2020-2020

COVID-19 hripui leng vanga HSSLC Exam March ni 23, 2020 atanga chawlhsan lailawk chu July ni 1, 2020 atangin exam chhunzawm a ni ta.

Mizoram chhunga HSSLC Exam Centre 79-ah exam hi neih a ni a. Subject la exam zawh loh - Economics, Chemistry, Sociology, Computer Science leh Home Science te exam chhunzawm leh tur a ni. Zirlai mahni centre pan thei lote tan Centre hnai leh pan awlsam berah exam tir an ni. Exam hi tunkar Zirtawpniah zawh fel a ni ang.

Subject hrang hranga zirlai exam tur zat hetiang hi a ni :
Economics - 2662
Chemistry - 2277
Sociology - 1641
Computer Science - 184
Home Science - 262

HSLC (Compartmental) Exam, 2020 pawh District headquarters 11-ah neih nghal a ni a, vawiin July ni 1, 2020-ah Theory paper exam a ni a, July ni 2-ah Practical tih leh nghal a ni ang. Tun tum Compartmental Exam atan hian zirlai 143 an awm a ni.

Covid-19 hripui laka zirlaite an him theih nan ruahmanna felfai leh tha tak buatsaih a ni a. Centre tam zawkah Exam Hall-a an luh hmain Thermal Screening neih hmasak vek a ni. Zirlai exam tur zawng zawngte facemask vuahtir an nih bakah kut silna leh hand sanitiser-te chhawpsak an ni a, naupangte pawh a inhlat thei ang berin thuttir an ni.

MBSE chuan exam chhunzawm a nih leh theih nana sawrkar department hrang hrangte thawhpuinaah lawmthu a sawi a. A bik takin, Health Department leh Home Department-ten thawktu indaih lo tak chunga Exam centre an vil sak avangin lawmthu a sawi a ni.

School Education Department chuan District hrang hrang atangin HSSLC Exam chhunzawm a nih thu leh HSLC compartmental exam neih a nih dan report a dawng a. District tina Officer-te chuan centre hrang hrang hi tlawhin an dinhmun an thlithlai hlawm a, tluang takin exam kalpui a nih thu an report hlawm a ni.

Attachment

  • Loading attachment...