No.2349/2020-2020

Lawngtlai, Nikir thla ni 23, 2020: Vawiin khan Lawngtlai District Level Task Force on COVID-19 (DLTF) leh Lawngtlai khawpui chhunga VLTF ai awhte, quarantine facility nodal officer-te leh zonal officer-te chu DLTF Chairman, Lawngtlai Bawrhsap Dr Andrew H. Vanlaldika, MCS hovin DC Conference Hall-ah an thu khawm a. COVID-19 hri leng darh zel tur khuahkhirh a nih theih nana Lawngtlai District chhunga inkharkhip kalpui chhunzawm dan tur an sawi ho.

Chairman Dr Andrew H. Vanlaldika chuan June ni 23 atanga June ni 30, 2020 chhunga Mizorama COVID-19 avanga inkharkhip kalpui chhunzawm dan tura state sawrkar atanga ruahmanna awmte a sawi fiah a. Hemi ruahmanna bawh zui dan tur leh hemi chungchanga Lawngtlai District chhunga chet lak chhunzawm dan tur te ngaihtuah ho a ni.

Chairman-in a sawm angin SDO(Sadar)/Incident Commander, Chief Medical Officer, District Medical Superintendent, Additional Superintendent of Police, Central YLA leh LADC ai awhte'n COVID-19 dona kawnga hma an lak dan report an pe a. Inkharkhip kalpui tawh dan leh COVID-19 dona kawnga hma lakna hrang hrangte thlir let niin, chumi atanga hma sawnna tur te sawi ho a ni.

Inkharkhip kalpui chhunzawm danah state sawrkar ruahmanna zul zuiin a pangngaia kalpui chhunzawm ni se, tih a ni a. Sawrkarin inkaihhruaina a duante khauh zawka kalpui a nih theih nan veng hrang hrangah police duty ruahman belh ni se, anmahni puibawm a, thawhpui turin VLTF-te ngen ni se, tih a ni.

Khawlaia mihring inhnaih chilh loh (social distancing) chu zawm zel tur niin, mi panga aia tam hmun khata awm khawm phal a ni lo va. Zan dar 7:30 atanga zing dar 4:30 inkarah COVID-19 kaihhnawiha duty leh DC-in phalna a pek ni lo tu mah khawlai chhuah phal a ni lo va, hemi chungchangah hian DC atangin inkhuahkhirhna thupek tihchhuah a ni ang.

Ram dang nena ramri chu la khar chhunzawm zel a ni a. Zirna in, biak in leh vantlang puipunna hmun hrang hrangte pawh khar chhunzawm a la ni rih dawn a. Inneih inkhawm leh mitthi vuinaah mi 35 aia tam pun khawm khap a ni.

Pawn chhuak tur reng rengin tha taka hmai tuam zel tur a ni a. DLTF chuan mipuite chu fimkhur reng tur leh tul bik tak tak lovah chuan pawn chhuah tum lui lo turin a ngen.