No.5641/2020-2021

Lawngtlai, Khuangchawi thla ni 1, 2020: Vawiin khan Lawngtlai District Level Task Force on COVID-19 (DLTF) leh Lawngtlai khawpui chhunga VLTF ai awhte, quarantine facility nodal officer-te leh zonal officer-te chu DLTF Chairman, Lawngtlai Bawrhsap Dr Andrew H. Vanlaldika, MCS hovin DC Conference Hall-ah an thu khawm a. COVID-19 hri leng mek kara Mizoram sawrkar thuchhuah bawhzuia October thla chhunga Lawngtlai District-a Unlock 4.0 kalpui dan tur an sawi ho.

Chairman Dr Andrew H. Vanlaldika chuan COVID-19 hri leng vanga inkhuahkhirh kawngah tha thlah lova tan reng a pawimawh thu sawiin, sawrkarin inkaihhruaina a siam leh fimkhurna dan a zamte chu thu awih taka zawm turin District mipuite a chah a ni.

Vawiin meeting-ah hian Incident Commander/SDO(Sadar) Pu V. Lalruatliana, MCS, Chief Medical Officer Dr LC Liana leh District Medical Superintendent Dr Zothanpari Chhakchhuak te hnen atangin report ngaihthlak a ni a. September thla chhunga Unlock 3.0 kalpui dan thlir letna hun hman a ni bawk.

Chairman-in Unlock 4.0 kalpui dan tura Mizoram sawrkar thuchhuah a chhiar chhuah hnuah a bawhzui dan tur sawi ho nghal a ni a. October thla chhung atana inkaihhruaina angin, sawrkar office-ahte kut silna hmanrua dah tur tih te, appointment neite chauhvin office dawr tur tih te, mask hman that leh office building leh a chhehvel tihthianghlim te chu khauh zawka kalpui ni se, tih a ni a. Zan pawn chhuah khap (curfew) chu zan dar 8:00 leh zing dar 4:30 inkar tia siam rem niin, khauh taka lekkawh zel tum a ni a, phalna nei lova vantlang hmuna mi 5 aia tam awm khawm pawh khap chhunzawm a ni.

Zirna inahte ralkhat atanga khawl hmanga inthlun zawma zirna (online distance learning) kalpui chhunzawm theih niin, pawl 9 atanga pawl 12 zirlaite chu an nu leh pate phalnaa zirtirtute rawn tura sikul kal phalsak an nih rualin, class pangngai kalpui emaw, hri laka him lo thei tura thil tih emaw a awm loh nan uluk taka en zui ni se, tih a ni a. Biak ina mipui inkhawm pawh la tih rih loh tur niin, zing tawngtai inkhawm, inneih inkhawm leh lawmna, mitthi vuina, lungphun, anniversary, politics leh pawl thila kal khawmnaah mi 50 aia tam pun khawm te, infiamna leh lehkhabu tlangzarhnaah mi 25 aia tam pun khawm te, tournament leh puipunna dang huaihawt te pawh khap chhunzawm rih tur a ni.

Mitthi vui chungchang bikah mi 50 aia tam pun khawm loh tur tih leh kohhran/community hall emaw, veng chhunga hall remchang dang emawa vuina hun hman tur tihte chu khauh zawka kalpui chhunzawm tura hma lak tum niin, contact tracing a awlsam nan mitthi vuinaa kalte pawh fel taka chhinchhiah ngei ngei tur tih a ni a. COVID-19 hri leng laka fimkhurna tur hrang hrangte chu veng chhung tlangau/au rinna kal tlanga uar zawka puan leh thin ni se, tih a ni.

State pawn atanga bungraw lut khawpui chhunga hlan thlak chungchangah fimkhurna dante chu khauh zawka kalpui chhunzawm zel ni se, tih a ni a. Bungrua hi zan dar 6 hnu lamah chauh hlan thlak theih a ni.