No.5640/2020-2021

Aizawl, the 1st October 2020 : Vawiin khan Pu H. Rammawi, Vice Chairman State Planning Board chuan Directorate of Economics & Statistics buatsaih a data zawnga Mizoram chanchin leh chhinchhiahna hrang hrang tarlanna lehkhabu ‘Statistical Abstract of Mizoram – 2019’ chu Planning & Programme Implementation Department Committee Hall-ah a tlangzarh.

Pu H. Rammawi chuan data zawnga chanchin leh chhinchhiahna te chu state hmasawnna hna hrang hrang thawh nan a pawimawh dante sawiin data chu hmasawnna inghahna bulpui a ni, a ti a. Chutiang a nih avang chuan thil reng reng hi data behchhana kan tih a pawimawh chho zel dawn a, data mamawhna a sang telh telh ang a, a dik thei berin data kan chhinchhiah a pawimawh a, heng te hi rintlak a ni ngei tur a ni, a ti.

Data reng reng a tir atangin dik tak leh felfai taka chhinchhiah a tul tiin a hnua thlak emaw siam danglam emaw hian thui tak nghawng a nei thei a, ram hmasawnna thlengin a tithuanawp thei a ni a ti. Department hrang hrangin data an neih dan te hun hmasa lama alo in mil thin loh avanga Minister a nih lai pawha harsatna a lo tawh dante sawichhuakin One State One Data hi kan neih theih ngei nan theihtawp chhuah a tul thu te a sawi a. Hetiang data chat lova kum engmaw zat atanga chhuah chu thil awlai lo tak ani tiin a buatsaihtute chu an fakawm a tih thu a sawi lang bawk.

He huna thuhmahruai sawitu Dr. C. Vanlalramsanga, Secretary & Commissioner, Planning & Programme Implementation Department chuan data tel lovin ram sum leh pai dinhmun dehchhuah te, Sawrkar hnathawh leh hlawhtlinna te leh mipui dinhmun dik tak a hriat theih lova, chuvangin official data kimchang tak neih a pawimawh hle a ni, a ti. Mizoram chu state naupang te ni mahse 2008 atang khan data kimchang tak a hunbi in kan ti chhuak a, hetiang ti thei state hi India ramah tlemte kan awma, chung zinga Mizoram kan tel thei hi a lawmawm a, Department a thawktute thawhrah a ni tiin a sawi. Sawrkar in data a tihchhuahte chu Mizoram University-a research bei mek ten an hmang tangkai hle niin a sawi bawk.

Lehkhabu tlangzarhna hi Dr. Lalrinchhana, Director, Economics & Statistics in kaihruaiin Pi Ruth Lalrinsangi, Research Officer chuan lehkhabu sawizauna hun a hmang a. Pi Lalrikhuma Sailo, Principal Adviser leh Additional Secretary, Planning & Programme Implementation Department chuan thusawina neiin hun a titawp a ni.

'Statistical Abstract of Mizoram, 2019' hi Directorate of Economics and Statistics, buatsaih a ni a. Statistical Abstract of Mizoram hi kum khat kar dan a, Statistical Handbook nena buatsaih thin a ni. Tun tum a mi hi a vawi 7 buatsaihna a ni. He lehkhabu hi, kum 2019 kum a Mizoram dinhmun/hlimthla a number ang zawnga tarlanna bu a ni ber a. Mizoram Statistics pawimawh tak tak tarlan a ni a, Central Sorkar leh State Sorkar intawm statistics - 619, State Sorkar department Statistics-42, Non-Government Organisations Statistics - 18, a vaiin, statistics chi hrang hrang 679 chuang a huam a ni. He lehkhabu hi a duh apiang tan, en leh download theih turin Directorate of Economics and Statistics website, des.mizoram.gov. in - ah tar chhuah tum a ni bawk.