Vawiin khan Lawngtlai DC Conference Hall-ah Disaster Management & Rehabilitation (DM&R) Minister Pu C. Ngunlianchunga hovin khuarel chhiatna thlen changa hma lak dan tur sawi ho a ni.

He hunah hian DM & R Minister Pu C. Ngunlianchunga chuan chhiatna thlenga harsatna tawkte'n DC lama report an pekte bawhzui vat a nih loh chuan mipuite'n harsatna an tawh phah fo thei a ni tiin, chuti ang thil a awm loh nana theih tawp chhuah turin thawktute chu a chah a. Khuarel chhiatna vanga in leh lo leh thil dang chhia report bo thlau mai mai a awm loh nan bawhzui vat thin a tul a ni, a ti. Minister chuan state sawrkarin chhiatna tawkte chhawmdawl nan pawisa eng emaw zat a dah thin a, tuar na na na tanpui chu sawrkar paw'n a hreh ngai lo a ni, a ti a. Khuarel chhiatna a lo thlena remchanga laa dik lo taka chhawmdawlna dawng an awm loh nan erawh department lam pawhin dik taka report pek a, a hmunah kal chilha endik zel ni thei se a duh thu a sawi a. Kuminah Mizoram pumpui tan khuarel chhiatna lo thlena chhawmdawl nan Rs vaibelchhe 35.9 hmuh a nih thu sawiin, hei hi district hrang hrangah sem darh a nih thu a sawi bawk.

He hunah hian Lawngtlai-III-a lei tlak hniamna  hmun te, Lawngtlai AOC, Thingkah leh Chandmary veng lama luikawr siam ngai leh Lawngtlai khawpui chhunga chhiatna thlen hlauhthawnawmna lai te venhim a nih theih dan tur sawi ho niin, Central YLA khelmual sir leimin venna tur NEDP atanga Rs nuai 30 ruahman a nih tawh thu pawh sawi lan a ni.

He thut khawmah hian state sawrkar department hrang hrang ai awh te, veng thenkhat VCP te leh Central YLA ai awhte an tel a ni.