No.2833/2021-2022
Aizawl Sahmulphah thla ni 1, 2021: Kum 2022 special summary revision atana hman tur Lawngtlai District-a assembly bial pathuma draft electoral roll chu vawiin khan Lawngtlai District Election Officer (DEO), Lawngtlai Bawrhsap ni bawk Dr Andrew H. Vanlaldika chuan DC Conference Hall-ah a tlangzarh a. Draft electoral roll hi political party ai awhte hnenah a hlan nghal.

DEO Dr Andrew H. Vanlaldika chuan India ram chu democracy, mipui rorelna ram a nih avangin khua leh tui dik tak, kum 18 tling chinin vote an nei thei a, hei hi ngaih hlut nachang hriata electoral roll-a inziah luh a pawimawh tih a sawi a. Inthlan felfai taka kalpui a nih theih nan electoral roll felfai leh dik a pawimawh tih sawiin, draft electoral roll felfai tak a hun taka tihchhuah a nih theih nana thawktu, EO leh ERO/AERO leh Election Branch chungah lawm thu a sawi bawk.

Draft electoral roll tlangzarh tak atanga a lan danin, 36-Tuichawng (ST) Assembly Constituency (A/C)-ah vote nei mipa 16,667 leh hmeichhia 16,355, an vaiin mi 33,022 an awm a; 37-Lawngtlai West (ST) A/C bialah vote nei mipa 13,828 leh hmeichhia 13,640, an vaiin mi 27,468 an awm a; 38-Lawngtlai East (ST) A/C bialah voter mipa 11,875 leh hmeichhia 12,722, an vaiin mi 24,597 an awm a; assembly bial pathumah hian vote nei mipa 42,370 leh hmeichhia 42,717, an vaiin mi 85,087 an awm a ni.

Final electoral roll, 2021 nena khaikhinin 36-Tuichawng bialah voter 30-in an kiam a, 37-Lawngtlai West bialah voter 17-a pungin, 38-Lawngtlai East bialah voter 51-in an kiam thung a; bial pathumah hian a pumpuiah voter 64-a kiamin, a kiamna hi 0.08% a ni.

Vawiin hian draft electoral roll for service voter pawh tihchhuah nghal a ni a. Sipai tang lai, service voter-a inziak lut, 36-Tuichawng bialah mi 142, 37-Lawngtlai West bialah mi 48, 38-Lawngtlai East bialah mi 36, a pumpuiah mi 226 an awm a ni.

Special summary revision neih turah hian luh belh, paih, insawn leh siam that duhte tan November ni 30, 2021 thleng hun hawn a ni a. January ni 15, 2022-ah final electoral roll chu tar chhuah tura ruahman a ni.