2584/2022-2023
Sahmulphah thla ni 9, 2022: Kum 2023 special summary revision atana hman tur Lawngtlai District-a assembly bial pathuma draft electoral roll chu vawiin khan Lawngtlai District Election Officer (DEO), Lawngtlai Bawrhsap Pu Amol Srivastava chuan Lawngtlai DC Conference Hall-ah a tlangzarh a. Draft electoral roll hi political party ai awhte hnenah a hlan nghal.
DEO Pu Amol Srivastava chuan draft electoral roll felfai tak a hun taka tihchhuah a nih theih nana thawktu, EO leh ERO/AERO leh Election Branch chungah lawm thu a sawi a. Kum 2023 chu inthlanpui kum a nih dawn avangin Lawngtlai District chhungah final electoral roll dik, felfai leh rin tlak tak a awm theih nan political party leh tlawmngai pawl te chu theih tawp chhuahpui turin a sawm a ni.
Draft electoral roll tlangzarh tak aṭanga a lan danin, 36-Tuichawng (ST) Assembly Constituency (A/C)-ah vote nei mipa 17,327 leh hmeichhia 16,845, an vaiin mi 34,172 an awm a; 37-Lawngtlai West (ST) A/C bialah vote nei mipa 14,061 leh hmeichhia 13,880, an vaiin mi 27,941 an awm a; 38-Lawngtlai East (ST) A/C bialah voter mipa 12,006 leh hmeichhia 12,881, an vaiin mi 24,887 an awm a; assembly bial pathumah hian vote nei mipa 43,394 leh hmeichhia 43,606, an vaiin mi 87,000 an awm a ni.
Final electoral roll, 2022 nena khaikhinin 36-Tuichawng bialah voter 28-in an kiam a, 37-Lawngtlai West bialah voter 333-a kiamin, 38-Lawngtlai East bialah voter 247-in an kiam thung a; bial pathumah hian a pumpuiah voter 608-a kiamin, a kiamna hi 0.69% a ni. Election Officer Pi B. Malsawmtluangi chuan Booth Level Officer (BLO)-te'n Garuda app an hman avang leh aadhaar nena EPIC thlun zawm hna ngawrh zawka kalpui a nih avangin mitthi tawh leh awm tawh lo hmuh chhuah leh paih an tam a, chu vang chuan voter kiamna chu ṭum dang aia sang a nih thu a sawi.
Vawiina draft electoral roll tlangzarhnaah hian Electoral Registration Officer (ERO) leh Assistant ERO te, political party ai awh leh tlawmngai pawl ai awh te, SVEEP Core Committee member te leh SVEEP PwD icon leh student ambassador te an tel a ni.
Special summary revision neih turah hian luh belh, paih, insawn leh siam ṭhat duhte tan December ni 8, 2022 thleng hun hawn a ni a. January ni 15, 2023-ah final electoral roll chu tar chhuah tura ruahman a ni.
Attachment
- Loading attachment...
