Vawiin chawhnu dar 1:00 khan Lawngtlai MJA buatsaihin Lawngtlai Press Club-ah Lawngtlai District chhunga Driver tha thlante chawimawina hun hman a ni a. Lawngtlai DC Pu B. Lalhmingthanga, Patron Member, Lawngtlai MJA chu Khuallian a ni.

Khuallian Pu B. Lalhmingthanga chuan driver te chu mipui rawngbawltu an ni a, an kutah mi tamtak nunna a innghat tih hre thar turin a chah a. Nun uluk, hawihhawm leh tlawmngai taka an hna thawk tur te, rinawmna leh taimakna nena sumdawng tur te in a fuih a ni.

DC hian driver tha lawmman a hlan nghal a. Taxi driver thaah Zirthanmawia, Lawngtlai - I chu thlan a ni a. Sumo driver thaah C. Lalsangzuala thlan niin Auto Rickshow driver thaah Dinzauva thlan a ni.

Driver tha chawimawina hun hi Pu V. Lallianzuala, Vice President, Lawngtlai MJA in a kaihruai a. Pu Vanlalngena, Addl. DC, Lawngtlaiin driver te fuihna thu a sawi a, Pu T. Vanlalmalsawmsanga, DTO, Lawngtlaiin motor lei leh hralh chungchang leh tax chungchang hriat tul te sawiin motor parking fee khawn tum a nih dan te a sawi bawk.