Vawiin chhun dar 12 khan Parliamentary Secretary Pu H. Zothangliana’n Rastriya Madhyamik Shiksha Abhiyan (RMSA) Fund atanga sak Rulkual Secondary School a hawng. Pu H. Zothangliana hi Pu V. Zirsanga, EM i/c School Education, Lai Autonoumous District Council te, Pu F. Hranglura, EM i/c Agriculture, LADC leh Pu Lalremruata Kullai, IPRO, Lawngtlai ten an tawiawm a ni.

Khuallian Pu H. Zothangliana chuan sikul din mai aiin enkawl zui a pawimawh tih sawiin ram pum tana hmasawnna thlentu ni turin Rulkual Secondary School chu duhsakna a hlan a. Mizorama loneitu leh kut hnathawk te tana NLUP hmanga sorkar hmalakna te, thalaiten infiamna lama hma an sawnna atana sorkar hmalakna te leh ram leh khawtlang hmasawnna atana sorkar hmalakna te a sawi lang a ni.

Pu V. Zirsanga, EM, LADC pawhin thu sawiin hna thawh that a pawimawhzia leh mawi taka hna zawh a tulzia te a sawi a. Rah seng tur chuan taimak a ngai tiin zirnaa intlansiakna hi hmasawnna atana investment tha ber a ni tiin a sawi a ni.