106/2025-2026

Lawngtlai,10th April 2026 : Vawiin khan Nasha Mukt Bharat Abhiyan-hnuaia Ruihhlo umbo tura beihpui thlakna pawimawh tak ' Drug Free District Campaign' hawnna inkhawm chu DC Conference Hall-ah neih a ni a. Pu Donny Lalruatsanga bawrhsap leh Chairman, Lawngtlai District Level Committee on Drug Free District - nibawk chuan kaihruaiin, Pu C. Lalsawmzuala, Chief Executive Member (CEM) LADC chuan campaign hawnna hi a nei.

Pu C. Lalsawmzuala chuan District Level Committee on Drug Free District Member-kalkhawmte hnena lawmthu sawina neiin, Lawngtlai District - ruihhloa a lo fihlim theih nan leh hlawhtling taka kalpui tura 'Drug Free Campaign' lawm a hawn thu a sawi a. Lawngtlai District - chu International Border- a awm a nih angin, Ruihhlo lo luh theihna a tam hle a, hemi a nih avang hian ruihhlo do kawngah pawh chak leh uar zawka hnathawh a tul takzet a ni, a ti. Ruihhlo awmlohna District - a puan chu thil awlsam a ni dawn lo a, sawrkar, VC, NGO, Kohhran leh mipuite tan tlan leh thawhho a ngai dawn hle a, theihtawp chhuahin i thawkho ang u tiin a sawm a ni.

CEM chuan Ruihhlo do kawngah fimkhur taka hmalak a tul hle a, ngaihtuahna thar nen ke pen a pawimawh tak zet a ni, a ti. Ruihhlo zuartu leh Ruihhlo bawiha tang mekte chhanchhuak turin sawrkar, NGO leh Kohhran ten theihtawp lo chhuah tawh thin mahse tha thlah theih a ni lo tih hriaa, thahnem ngai taka thawh zel chu thil pawimawh hmasa a ni, a ti a. Ruihhlo do kawngah LADC pawhin theihtawp a chhuah thin thu tarlangin, tha thlah loa hmalak zel a nih tur thu a tarlang a. Pu C. Lalsawmzuala chuan tanrual hi chakna a ni tiin, Ruihhlo do kawngah LADC leh District Administration - ten theihtawp an chhuah tlan zel tur thu tarlangin, VC, NGO, Kohhran, MJA leh mipuite tihtakzeta ruihhlo do pui turin a sawm nghal a ni.

Pu Donny Lalruatsanga chuan Mizoram sawrkar hmalakna liah lamah Central Sawrkar hmalakna pawimawh tak a ni a, hemi hnuaiah hian committe peng hrang leh pawimawh tak tak a awm a ni, a ti. Central Sawrkar atanga sum leh pai lokal, Ruihhlo tirem tura hmalakna a nih angin Lawngtlai District chu ruihhlo awmlohna ' Drug Free District' a siam tura theihtawp chhuah a nih tur thu a tarlang a. Ruihhlo do kawngah sawrkar Department ,VC,NGO, Kohhran leh mipuite tha taka thawkho turin duhsakna a hlan a. Ruihhlo leh a kaihhnawihin ram leh hnam a tichhiat nasat zia tarlangin, a do kawngah tha thlah theih a ni lo a, Police, Excise leh NGO - te hmalakna ringawt a tawk lo tiin, mitinin beihpui thlak ngai thil a ni tiin, Bawrhsap chuan theihtawp chhuaha Ruihhlo do turin kalkhawmte leh Lawngtlai mipuite a sawm nghal bawk.

Pu PC Lalchunglura, Superintendent of Police chuan thutawi sawina neiin, Bawrhsap hmalakna fakawm a tih thu a sawi a. Drug Free District/ Village - ni turin mitinin mawhphurhna lian tak an nei tih tarlangin, thawhhona tha a awm zel a pawimawh tak zet a ti a. Ruihhlo do leh tihrem kawngah theihtawp chhuah lo nitawh thin mahse tha thlah lo a, thawhhona tha tak nena ruihho do zel a pawimawh tak zet tiin, thawhpuiah Lawngtlai District mipuite a sawm a ni.

Pi Malsawmtluangi, Superintendent, DC Office chuan Power Point Presentation - pekna a nei a. Drug Free Campaign - chu 'Nasha Mukt Bharat Abhiyan' hnuaia kalpui tur niin, Lawngtlai District - chu ruihhlo hmansual leh tawlhruk awmlohnaa siam a ni, a ti a. LADC huamchhunga khua - 99, CADC huamchhunga khua - 88, avaiin Lawngtlai District chhunga khua - 187 ah kalpui a ni ang. Drug Free Campaign- hi kum thum chhung atan kalpui tura duan niin, a tul anga pawhsei theih a ni ang a ti. District Level, Block Level leh Village Level - ah te Committe din tur niin, mahni thuneihna zawn theuhah hmalak tur a ni dawn a ni. District Administration hriatpuia Drug Free Vilalge - a puante chu Independence Day apiangin Certificate of Recognition leh Citation - hlan an ni ang a ti.

Vawiin hun hmannaah hian ' Lawngtlai District Level Committee on Drug Free District' Member- te an telkim tha hle a, Pu Jammy Vanhmingliana, SDC, chuan lawmthu sawina neiin hun a khar.