105/2025-2026 

Dated Khawzawl, the 9th April, 2026 : Vawiin khan Public Works Department (PWD) Minister Pu Vanlalhlana chuan PWD Biate Sub-division office hawnna hun chu PWD IB-ah khuallian niin a hmanpui a. He hun hi PWD Engineer-in-Chief Er. H. Zoramliana’n a kaihruai a, Hrangturzo bialtu MLA Pu Lalmuanpuia Punte leh Lunglei West bialtu MLA Pu T. Lalhlimpuia te an tel a ni.

Minister Pu Vanlalhlana chuan Biate khua chu khaw fai leh chhuanawm tak a nih thu sawiin, Biatea PWD Sub-Division office hawn a ni chu lawmawm a tih thu a sawi a. SASCI hnuaiah Biate leh a chhehvel khuate tan kawngpui tha siam turin hma lak mek a nih thu tarlangin, vaibelchhe 15 sengin Artahkawn leh Biate inkar kawngpui siamthat a nih dawn thu leh Central Road Infrastructure Fund (CRIF) atanga dawn vaibelchhe 10 sengin Tuipui kawng pawh siamthat a nih tur thu a tarlang a. Transparency International leh NITI Aayog data behchhana CMS India Corruption Study in a hmuhchhuah danin Mizoram chu India rama Lakshadweep dawta eirukna tlem berna state a ni chu lawmawm a tih thu a sawi a. Thenzawl-ah Division thar din a ni tawh a, tunah hian Biate ah Sub-Division din leh a ni bawk a, heng hi khawtlang miten an chhawr tangkaia, neitu rilru pu chunga sawrkar nen tha taka an thawhho a beisei thu a sawi.

MLA Pu Lalmuanpuia Punte pawhin he hunah hian thusawiin, Biate khua hi tunhmaa khaw lar nimahse sawrkar hmunpui a awm loh avangin a than lem loh thu a sawi a. Vawiina PWD sub-division hawn a ni ta hi lawmawm a tih thu sawiin, sawrkar department dangte pawhin office an hawn belh zel a beisei thu a sawi.

MLA Pu T. Lalhlimpuia chuan PWD-a thawktute chu office-a file khawih chunga field-a thawhchhuah reng ngai an nih avangin vawiina Biate PWD sub-division hawn tak hian field leh file inkar a tihnaiin Biate khua tan hmasawnna a thlen ngei a beisei thu a sawi.

Chief Engineer (Roads) Er. David Sapzova chuan report a pe a. Biate sub-division-in a enkawl tur kawngte chu Chalrang atanga Biate panna te, Khawhai atanga Tlangpui panna te, Tlangpui atanga Lungva panna te, Chalrang atanga Vantlang panna te, Khawhai atanga Lungtan panna te, Chalrang atanga Riangtlei kawng te, Biate atanga East Lungdar panna te, Biate atanga Tuipui panna te, Biate atanga Bungzung panna kawngte an ni.

Vawiin PWD sub-division hawnna inkhawmah hian PWD officer-te leh Biate khawtlang hruaitute thahnem tak an tel a ni.