Vawiin khan District Research Officer (DRO) Conference Hall, Lawngtlai-ah India ram chhungkaw tin eizawnna dinhmun chhinchhiah chhiarpui (Economic Census) vawi 7-na neih tur Lawngtlai District chhunga kalpui dan tur inzirtirna leh sawi hona "district level training cum coordination committee meeting” buatsaih a ni.

District Coordination Committee Chairman, Lawngtlai Bawrhsap ai awhin Sub-Deputy Commissioner Pi Christina Lalmuanzuali MCS chuan he training hi hawngin, chhiarpui hna thawk tur supervisor leh enumerator kal khawmte fuihna thu a sawi a. Chhiarpui (census) chu sawrkar hma lakna hrang hrang beh chhan atan hun rei tak chhung hman zui a nih thin avangin, uluk leh fimkhur taka kalpui a, a dik thei ang bera chhinchhiah a pawimawh thu a sawi.

He hun hi Lawngtlai DRO Pi H. Chhunkungi chuan kaihruaiin, hun buatsaih chhan a sawi a. District Coordination Committee member-te bakah, census buaipuitu turte atanga thu sawi ngaihthlak niin, sawi hona hun pawh hman a ni.

Chawhma lama training hawnna leh member-te hnena economic census chungchang inhrilh hriatna hun hman a nih hnuin, chawhnu lamah census buaipui turte tan technical session buatsaih a ni a. Common Service Centre (CSC) e-Governance atangin District Manager Pu Paul LT Zela chuan 7th Economic Census chungchanga hriat tur pawimawh hrang hrang a zirtir a. District Manager Pu K. Lalfamkima chuan mobile app hmanga chhiarpui thil chhinchhiah dah luh dan (Economic Census Data Entry using Mobile Apps) a ziirtir thung a. Zawhna leh chhanna hun hman a ni bawk.

India Economic Census hi kum 1977 atanga neih tan niin, kum 1980, 1990, 1998, 2005 leh 2013 te khan neih a lo ni tawh a. Tun hi a tum 7-na tur a ni.

Tun tum economic census hi CSC e-Governance kal tlanga neih tur niin, data hi mobile app hmanga chhut luh vek tur a ni a. A hmuna kal chilh ngeia chhiarpui hi kalpui a nih theih nan in awmna hmun chhinchhiahna (geo tagging) hman a ni dawn bawk. Lawngtlai District-a census buaipui tur hian supervisor 9 leh enumerator 50 an awm dawn a ni.