Vawin khan Chhimveng YMA Hall, Mamit-ah MZP Headquarters Mamit bultumin zirlai tithate chawimawina neih a ni a. Er.H.Lalzirliana, Bialtu MLA chuan khuallian niin he hun hi a hmanpui.

Khuallian Er H. Lalzirliana, MLA chuan Mamit District hmasawnna turin theihtawpa ke pen a pawimawh thu sawiin zirnaah pawh Mamit chu kan la hnufual hle a, hmasawn tura chak taka ke kan pen a ngai a ni a ti. Taima taka zirte tan hlawh tlinna a awm thin a. Mi vannei kan tihte, mi hlawhtling leh hausa tak takte pawh harsatna tam tak paltlang leh taima taka thawk thinte an ni a. Chuvangin zirlaite chu zirna kawngah taima turin a chah. 

Pu Zira chuan lehkha zirna kawngah eng Division-ah pawh Pass ila a tha vek a, line tha leh tha lo pawh a awm lova, a pawimawh ber chu a hmasawn zawng leh a thang zawngin kan kal em tih a ni a ti a. Eng pawh ti ila tih tak takna nena ti tura chahin zirlai Pass thar zawng zawngte duhsakna a hlan a ni.

He huna Khualzahawm Dr. Lalrozama, Mamit District Bawrhsap pawhin thu sawiin Mamit District chu District hnufual kan nihna atanga chhuak turin theihtawpchhuah mek zel a ni a. District khawpui chhung mai ni lo, District chhunga khaw hrang hrangte pawh chawikanna tura theihtawpchhuah a nih thu a sawi. Hmasawn tur chuan lehkha thiam nih a ngaih thu sawiin lehkha thiamna chuan finna leh hmangchang hriatna min pe tur a ni a ti bawk.

He hunah hian Pu Michael Lalramsanga, Treasurer, MZP General Headquarters leh Christopher Lalmuankima President,  MZP Hqrs, Mamit-te'n zirlaite fuihna thu tha tak tak an sawi bawk.

He hunah hian MZP te'n HSSLC Distinction-a pass 5, First Division-a pass mi 15 bakah HSLC Distinction-a pass mi 18 hnenah chawimawina thuziak an hlan a. Hei bakah hian Mamit khawpui chhunga Zirna In 2, HSLC result tihchhuah taka zirlai naupang zawng zawng Passed vekna, St. Francis of Assisi School leh Presbyterian English Medium School-te hnenah chawimawina hlan an ni bawk. 

Zirlai tithate chawimawina hunah hian Mamit Bialtu MLA, Pu Er.H.Lalzirliana'n apa Upa H.Thanzauva hriatreng nana a bial chhung zirlai HSLC leh HSSLC  passed zawng zawngte tana a buatsaih Upa H. Thanzauva Award chu hetiang hian hlanna neih a ni bawk.

1. Distinction : Rs.3000 leh Certificate bakah Lehkhabu (Zirna kai lawn).

2. I Division : Rs.1000/- leh Certificate bakah Lehkhabu (Zirna kailawn).

3. II Division : Certificate leh Lehkhabu (Zirna kailawn).

4. III Division : Certificate leh Lehkhabu (Zirna kailawn).

Upa H. Thanzauva Award hi Mamit khawpui chhunga HSLC Passed zirlai 82 leh HSSLC Passed 77, an vaiin mi 159 te'n dawngin Mamit Constituency huam chhung hmun dangah erawh YMA-te kaihhruainain YMA Day-a sem tura ruahman a ni.

Vawiin zirlai tithate chawimawina hunah hian zirlaite leh zirlai nu leh pate bakah khawtlang hruaitute an tel a ni.