Vawiin hi khawvel puma ei tur vawn thianghlim leh ei in hriselna inzirtirna ni “World Food Safety Day” a nih angin hemi puala thutiam sawi rualna Directorate of Health Services Office, Dinthar, Aizawl-ah neih a ni a. He hunah hian staff kalkhawm ten faina kawnga thutiam sawi rualin hun an hmang a. Hemi hnu hian Principal Director, Health & Family Welfare Office Chamber-ah World Food safety pualin hun hmanho leh a ni bawk.

He World Food Safety Day puala hun buatsaih hi Dr.F.Lallianhlira, Principal Director in a kaihruai a. Programme Officer kalkhawmte hmaah mipuiten ei leh in thianghlim pawimawhzia an hriat theih nana thawktuten tan an lak a tulzia a sawi.

Pu Lalsawma Pachuau, Joint Director, Food & Drugs Administration chuan Power-point presentation hmanga report pein, World Food Safety Day chu UNO thutlukna angin Mizoramah a turn khatna atana hman a nih thu a sawi a. Kum tinin he ni hi ei leh in thi­anghlim chungchanga inzirtirna hun atan hman chhunzawm chhoh zel a nih tur thu a sawi bawk.

Pu Lalsawma report-in a tarlan danin khawvel pumah hian kum tin ei leh in thianghlimlo atanga natna kai mi maktaduai 600 chuang an awm ziah ni a chhut a ni a, mihring 10 zela pakhat ten ei in thi­anghlim lo avangin natna an kai thin a ni. Tin, kum tin naupang kum 5 hnuai lam zaa 40 ten ei tur thi­anghlimlo an ei avangin natna an vei ziah bawk a. Heng bakah hian kum tin ei leh in thianghlim lo ei avangin mi 1,25,00 an thi ziah bawk niin mithiam ten an chhut bawk a ni.

Pu Lalsawma chuan World Food Safety Day thupui “Food Safety, Everyone Business” tih chu sawifiahin, “Ei leh in thianghlim tih hian a huam zau em em a, From Farm To Fork tih a nih angin a chinna hmun atanga kaa a luh thlengin a huam a. A chin dan, a thar chhuah leh a siam chhuah bakah, dah that dan thlengin a pawimawh vek a ni. Chuvangin, hemi kawngah hian fimkhur namen lova kan thanharh tlan a hun tak zet tawh a ni” a ti a,” Kumin thupuiin min zirtir a tumn ber ‘If it is not safe, It’s not Food’ (a thi­anghlim loh chuan ei tur a ni lo) tih chu a taka kan kalpui a ngai ta a ni” a ti bawk.

He huna kalkhawmte hian Mizoramin kan hriat lar em em Di-chloro-diphenyl-trichloro-ethane, DDT hman dan dik lova hman a hlauhawmzia te pawh sawiho niin, DDT hi leilunga kal ral mai thei lo a ni a, thlai zung atangin thlai hnah leh rahah a inchhek zel a, chu carcinogenic hlauhawm tak chuan mihringah nghawng rapthlak tak a thlen leh theih thin avangin mipuite hnenah nasa lehzuala zirtirna pek a ngaih thu sawi lan a ni bawk.