Vawiin khan Lawngtlai DC Conference Hall-ah MLA Inthlanpui 2018-a Lawngtlai District-a election duty turte'n postal ballot hmanga vote an thlak theih nan facilitation centre hawn a ni a. Election duty turte'n postal ballot hmangin vote an thlak.

Election-a duty turte hian vote thlak hun pangngaiah vote an thlak hman ve dawn loh avangin postal ballot hmanga vote thlaktir an ni thin a. Tun inthlanpui atan pawh hian postal ballot vote tha taka a tlak theih nan facilitation centre hi ruahman a ni a. Vawiin hian Nodal Officer Pi Rochuangkimi Khenglawt MCS hovin postal ballot hmanga vote thlak dan tur inzirtir hmasak a nih hnuin, hmun li-ah official-te chuan vote an thlak a ni.

Vawiinah hian 36-Tuichawng (ST) Assembly Constituency-ah vote nga (5), 37-Lawngtlai West (ST) Assembly Constituency-ah vote sawmthum pasarih (37), 38-Lawngtlai East (ST) Assembly Constituency-ah vote sawmsarih pasarih (77) leh district pawn constituency dangah vote sawmruk pariat (68), a zavaiin vote 178 a tla a ni.

Kum dangah chuan vote chhiar ni thlenga postal ballot vote lutte chu chhiar vek a nih thin laiin kumin atang hi chuan a tih dan thlak danglam a ni a. Official-te'n an postal ballot vote chu anmahnia daka thawn lovin, facilitation centre-ah hian a lut khawm ang a, chu chu a hlawmin thawn tur a ni ang.

Postal ballot vote thlak hun atan hian November ni 19, 20 leh 21 te ruat a ni a. Hemi chhunga vote thlak hman lote chu pawn a ni dawn lo va. Tin, form 12 hmanga postal ballot vote dilte chuan postal ballot vote an thlak emaw an thlak lo emaw, a pangngaiah vote an thlak thei tawh dawn lo a ni.

Lawngtlai District atan bik chuan November ni 20 leh ni 21-ahte Govt Region HSS-ah facilitation centre hi hawn leh a ni ang.