November ni 28-a Mizoram State Assembly Inthlanpui neih tur atana Lawngtlai District bika Expenditure Committee chu Nimin khan District Election Officer Pu N. Chakhai MCS hovin Lawngtlai DC Conference Hall-ah an thu khawm a. Inthlannaa sum hman dan tur an sawi ho.
He hunah hian constituency pathuma Returning Officer 3-te, Election Officer leh political party hrang hrang ai awhte an tel a. Inthlan inbuatsaih nana candidate pakhatin pawisa a hman theih zat chu Rs nuai 20 a nih thu sawi lan a ni. He thut khawmah hian inthlan vuakveta hmanrua leh thil dang pawisa sen ralna tur hrang hrangte tualchhung rate anga chhutin a man tur an bithliah fel a. He'ng zingah hian public meeting neih nana sum sen ral tur te, candidate-te fakmawina leh thil dang mipui hmuha tar chhuah tur chhut (print)-na man zat tur te pawh a tel vek a ni.
Lawngtlai District chhunga assembly bial pathuma inthlan buatsaih tur hian tih tur tulte tih chhoh mek niin, Election Commission lamin tih tur a tihte chu a hun chhungin peih fel nghal zel a ni a. Inthlana mawhphurhna nei hrang hrangte pawh training pek chhoh mek niin, Model Code of Conduct bawhchhiatna a thlen leh thlen loh enfiahtu Flying Squad te chu chhun zan zawmin an duty reng tawh a ni.
