Vawiin khan Lawngtlaia NIC Video Conference Hall-ah MLA Inthlanpui 2018-a Lawngtlai District-a constituency pathuma duty tur polling party tur leh reserve party turte thliar fel a ni.

He hunah hian constituency pathuma RO pathumte bakah, Election Officer, DIPRO leh election staff te an tel a. Polling official atana ruat chhuah mi 836 atangin a taka duty tur leh reserve turte thliar fel an ni. He thliar felnaah hian induhsak bikna leh thil fel lo a awm lohna turin Election Commission of India (ECI) randomisation software hman a ni a. Polling official atana ruat chhuahte chu an hming hmun khatah dah luh vek niin, he software hian a inpawlhsawp thei tur ang berin a lo thliar a ni.

Polling official-te duty-na tur polling station hi pink polling station (hmeichhe awm theihna tur hmun) leh normal polling station (a pangngai)-ah te then hran a ni a. Lawngtlai District-a constituency pathumah hian pink polling station pakhat theuh a awm a; he’ngah hian hmeichhia chauh an duty dawn a ni. Vawiina randomisation tihnaah hian pink leh normal polling station hi a hranga tih a ni.

Vawiina tih tak first stage randomisation of election polling officials hi polling party tur leh reserve tur thliarna a ni a. Second stage-ah chuan an duty-na tur constituency thliar fel niin, third stage-ah an duty-na tur polling station thliar fel a ni ang.

Lawngtlai District-ah hian polling station 161 awmin, he’ngah hian polling official pali zel an duty dawn a. Polling party mi 644 leh reserve mi 192 an awm dawn a ni.