Vawiin khan Lawngtlai DC Conference Hall-ah Lawngtlai District chhunga print leh electronic media-te tan inthlan kaihhnawiha hriat tur leh tih tur pawimawh hrang hrang zir hona buatsaih a ni.

He hun hi Lawngtlai District Election Officer, Lawngtlai West constituency Returning Officer (RO) ni bawk Pu N. Chakhai MCS chuan kaihruaiin, media chu mipuite kaihruai thei hmanraw hriam tak a ni a, dik taka hman a nih chuan a tangkai em em a, hman sual erawh chuan thil pawi tak thlen thei a ni, a ti a. Mipui rorelnaah sawrkar tha tak siam turin media mite chuan mawhphurhna pawimawh tak an nei tih sawiin, chu chu dik taka hlen chhuak turin media mite chu a sawm nghal.

He hunah hian Tuichawng constituency RO Pu R. Lalremsanga MCS leh Lawngtlai East constituency RO Pu Andrew Vanlaldika MCS te pawhin thu an sawi a. Lawngtlai DIPRO, Media Certification & Monitoring Committee (MCMC) member secretary ni bawk Pu C. Lalhruaitluanga MIS chuan media mite tana Election Commission of India (ECI) leh Press Council of India (PCI)-in inkaihhruaina an siam te, MCMC hna thawh dan tur hrang hrang leh Representation of People Act, 1951 hnuaia media-te zawm tur dan chungchang te a sawi a. Media mi kal khawmte nen Lawngtlai District chhunga inthlan muanawm leh felfai tak a awm theihna tura media kal tlanga hma lak ho dan turte sawi ho a ni bawk.