Vawiin khan Lawngtlai DC Conference Hall-ah Faina Hapta 2017 kharna hun hman a ni a. Lawngtlai Chief Medical Officer Dr Thani Pachuau-in kaihruaiin, sawrkar official te, VC leh tlawmngai pawl ai awh te an tel.

He hunah hian Lawngtlai DC Dr Arun T., IAS chuan thu sawiin, mi hrisel, hlawhtling leh hlim thei ni turin fai leh thianghlim hmasak a ngai, a ti a. Faina tel lova hma sawnna chu hmasawnna khingbai a ni tiin, kawng tinrenga hmasawn turin faina kan ngaih pawimawh hmasak a tul a ni, a ti. Tun hnaia khawpui fai thlannaah Lawngtlai khawpui chu a hniam lamah awm mah i la, kum thar lamah chuan a sang pathum zingah tel ngei kan tum ang, a ti a. Faina hapta chhunga hma lakna leh faina chu kar khat awh lek ni lo, kum tluana chhunzawm zel tur a ni tiin, faina kawnga uar leh zuala tan la turin District mipuite chu a sawm nghal a ni.

LADC-a Executive Member Pu Laltlawmlova Chinzah pawhin thu sawiin, faina chu naupang atanga inzirtir a, an rilrua tuh a tul, a ti a. Faina kawngah mi tinin mawhphurhna kan nei theuh va, thawh hona tha tak nen hma lak a tul tiin, chanchinbu hmang leh kawng hrang hrangin inzirtir uar a ngai a ni, a ti bawk.

He hunah hian Lawngtlai District Hospital Medical Superintendent Dr Lalmalsawmi Hmar chuan damdawi in fai inelna ‘Kayakalp Award 2017’ atana District Hospital hma lakna hrang hrangte powerpoint hmanga tar langin, tih tak zeta beih chuan rei lo teah hma sawnna hmuh mai theih a nih thu a sawi a. Lawngtlai Electric Veng VCP Pu K. Laldinmawia leh District Sericulture Officer Pu R. Lalbiakthanga te pawhin thu tawi an sawi a. Lawngtlai SDO (Sadar) Pi Rochuangkimi Khenglawt MCS chuan lawm thu a sawi bawk.

Vawiin hian Faina Hapta 2017 hman chhunga office, zirna in, hotel/restaurant/thingpui dawr leh veng fai thlan chhuahte hnenah lawmman hlan nghal a ni a. Lawmman dawngtute chu: office fai berah District Medical Superintendent office, 2-na Land Resources, Soil & Water Conservation Department office leh 3-na Deputy Conservator of Forest (CWD) office te an ni a; zirna in fai berah Rev. Thanzinga Memorial M/S, 2-na Govt Chandmary P/S-I leh 3-na Bethel M/S te an ni a; hotel fai berah Lairam Hotel-I, Lawngtlai Bazar, 2-na Ruthi Restaurant, Lawngtlai Bazar leh 3-na MB Restaurant, Lawngtlai Chandmary te an ni a; veng fai berah Lawngtlai Vengpui, 2-na Bethel Veng leh 3-na Vengpui-II te an ni. He hunah hian Lawngtlai khawpui chhunga VC tin hnenah UD&PA Department Lawngtlai chuan khawlai dunga hun tur bawlhhlawh bawm 81 an sem chhuak nghal a ni.