Vawiin hian Serchhip DC Conference Hall ah Faina Hapta 2017 kharna hun hman ani a, Pu C. Lalhminghlua, President, MJA chuan kaihhruaiin Pu Chuauhnuna, Addl. DC chu khuallian a ni.

Khuallian chuan, tun hnai lawka District khawpui fai inelnaa Serchhip dinhmun tha tawk lo chuan mut a tihtui loh thu sawiin, India ziak leh chhiar thiam tamna ber khawpui ni chunga hetiang dinhmuna kan ding hi lungawi mai chi niin a lang lova a ni, a ti. Kan dinhmun a that loh chhan nia rin theih ta ber chu Serchhip khawpui chhungah NH 54 km 7 vel a kal tlanga, heng kawngah hian side drain a awm loh vek vang nia a hriat thu sawiin, side drain siam tura sawrkar emaw NH 54 enkawltute emaw besei lova, kan mawha laa tha thara kan beih a tul a ni, a ti. Pu Chuauhnuna chuan, faina hi man nei a ni a, kan fai dawn phawt chuan a man pek ngai apiang kan pek ngam a tul a. Fai lawmman dik tak chu hriselna leh damreina a nih bawk avangin Serchhip khawpuia cheng zawng zawngte kan insan mar a tul a ni, a ti a. Chutih mek laiin tun kum chanve hnu lama Serchhip khawpui faina lama hma a sawn nasat zia leh a lo thianghlim tak zia hrechiangtu a nih thu te, lawmawm a tih thute a tarlang bawk.

Khuallian hian Faina Hapta chhunga veng fai inelnaa lawmman dawngtute hnenah lawmman hlanna a nei nghal a, pakhatna hi VC 1, Vengchung ten dwangin pahnihna hi New Serchhip North, pathumna hi New Serchhip South ten an dawng a ni.

Faina Hapta kharna hunah hian Swachh Vidyalaya Puruskar 2016 a Green Category dawngtu School pahnih te lawmman dawn chu hlanna hun neih nghal a ni bawk a. He lawmman dawngtute chu Sialhau RMSA Secondary School leh Government Democratic High School, Khumtung te an ni. He State Level Swachh Vidyalaya Puruskar Award hi an tih that dan Category a teh an ni a, Green Category hi  90-100% Grade niin Government Democratic High School hian 96%, Sialhau RMSA School hian 95% an score a ni.

He Hapta Kharna inkhawmah hian Pi Vanthangpuii, DUDO chuan  Faina Hapta hman dan report a pe a, Pu Beitlotha Nohro, MCS, SDC chuan District Sanitation Task Force hmalakna hrang hrang te report a pe bawk.

He hunah hian District Officer te, tlawmngaipawl aiawhte, chanchinbumite, khawtlang hruaitute leh zirlai naupang engemaw zat an tel a ni.