Vawiin khan Lawngtlai DC Conference Hall-ah Bawrhsap Pu N. Chakhai MCS hovin Lawngtlaia Faina Hapta 2018 hman dan tur rel a ni.

Kumin Faina Hapta (Swachh Bharat Cleanliness Week) hi October ni 2-9 chhung hman tur a ni a. Lawngtlaiah chuan a hawnna hi October ni 2, 2018 zing dar 6:30-ah Lawngtlai Bazar Venga Areopagy hmunah hman ni se, tih a ni. He hunah hian Lawngtlaia state leh LADC hnuaia office hrang hrang hotu lute, NGO hrang hrang leh sikul naupangte tel tura beisei an ni a. Hawnna hun hman zawh hian khawlai dunga bawlhhlawh chhar fai hnatlang neih nghal a ni ang.

Vawiin meeting-ah hian Faina Hapta hman tura chanvo hrang hrang nei turte ruat nghal an ni a. Faina Hapta hman chhung hian office, zirna in leh hotel/thingpui dawr fai thlan chhuah a, lawmman pek leh ni se tih niin, a enfiah tur te pawh ruat nghal an ni a. Veng fai inelna erawh chu Swachh Bharat Mission (Gramin) hnuaiah PHED-in an buatsaih dawn avangin UD&PA lam atang chuan tih tel loh mai ni se, tih a ni.

Vawiinah hian October ni 9 chawhma dar 11-a DC Conference Hall-a Faina Hapta kharna hun hman dan tur pawh rel nghal a ni bawk.