India Hnam Pa Mahatma Gandhi pianchampha phak puala kum tina buatsaih thin October ni 2-9 awh tur Faina Hapta (cleanliness week) 2019 chu Lawngtlai District tan tukin zingkar khan Lawngtlai Bazar Venga Areopagy-ah Lai Autonomous District Council (LADC)-a LAD changtu Executive Member Pu H. Chhuanawma'n a hawng.

Faina hapta hawnna leh Swachhata hi Seva puala hun hmanah hian Pu H. Chhuanawma chuan kum tin faina hapta hman thin leh sawrkar leh tlawmngai pawl atanga hma lakna hrang hrang avangin Lawngtlai khawpui chu a fai tawh viau tih sawiin, hma sawn zawnga ke pen zel erawh a la tul a ni, a ti a. Mihring hriselna leh ram leilung tana plastic hnawksakzia inzirtirna kalpui mek chu a taka zawmtu leh nunpuitu ni theuh turin kal khawmte chu a chah a. Thlen tawh china lungawi mai lo va, rahbi thar kai zel tum turin a fuih nghal bawk.

Lawngtlai UD&PA-a District Project Officer (DPO) Pi Rochuangkimi Khenglawt chuan hun kaihruaiin, 'Swachhata Hi Seva' (Fai Hi Rawngbawlna A Ni) hma lakna hnuaia 'plastic hmang lo tura intiamna' (Pledge for a Plastic Free India) chham rual a ni a. Lawngtlai Bawrhsap Pi Shashanka Ala pawhin faina thuchah sawiin, Nehru Yuva Kendra (NYK) bul tuma Fit India Campaign puala zing tlan paha plastic bawlhhlawh chhar fai tura chhuak youth club-te zinga member chhuak tha zual 5 hnenah Addl DC Pu B. Lalchhawntluanga chuan NYK atangin football pahnih, volleyball pakhat leh net pakhat theuh a hlan a ni.

Tukin hun hmanah hian sawrkar official-te leh tlawmngai pawl hrang hrang bakah, zirlai naupangte telin, hawnna hun hman zawh hian hmun thumah inthenin khawlai dunga bawlhhlawh then fai hnatlang neih zui nghal a ni.

Kumin faina hapta pual hian Lawngtlaia sawrkar office fai, sikul fai leh hotel/thingpui dawr fai thlan a ni leh dawn a. Heta thlan chhuahte hi October ni 9-a faina hapta kharnaah lawmman hlan an ni ang.

Hetih lai hian Mizoram khawpui fai inelnaah kum 2019 atan Lawngtlai District chu district headquarters zingah 5-na niin, khawpui (town) zawng zawng zingah 9-na a ni bawk.