Chite Lui chhanchhuah leh humhalhna tura hmalakna pawimawh tak Chite Lui thianfai tura NSS Hnatlangpui Vawi III-na chu vawiin (October 2, 2019) khan Chite Luikamah hmun thuma inthen darhin neih a ni a. Kumina NSS Hnatlangpui hi Save Chite Lui Coordination Committee (SCLCC) leh Mizoram State NSS office leh Aizawl City PYD Coordination Committee (ACPYDCC) te tangkawpin an buatsaih a ni.

Ramthar Veng kaia Hnatlangpui hawnna inkhawm chu Pu Sainghinga Sailo, Adviser, MUP General Hqrs. in a kaihhruai a. SCLCC General Secretary Pu Rochamlianan thu tawi a sawi hnuah hnatlang hawngtu Pu R. Lalzirliana, Minister chuan thusawiin Aizawl khawpui timawitu leh tinuamtu Chite Lui hian hmangaihtu leh lainattu a mamawh thute, a kum telin Zofate tana lui hlu tak hian chhiat lam a pan zel thute sawiin khawpuia chengten phur taka tan kan lak chuan Chite Lui hi kan chhanchhuak leh thei ngei ang tih a beisei thu a sawi a. Chite Lui chu an naupan lai atanga an hriat chian, an lui kalna leh sangha fuan an ven thinna hmun anih thu sawiin tuna a dinhmun chu a lung awi thlak loh hle a ni a ti a. A bik takin a kam tuaka khawsaten mawhphurhna sang lehzual an neih thu leh a hnar atanga bawlhhlawh tilut thintute pawhin inenletna tur an neih thu uar takin a sawi a ni.

Chite Veng kaia Hnatlangpui hawnna inkhawm chu Evan. K. Rotluanga, Chairman, ACPYDCC in a kaihhruai a. Hnatlang hawngtu Pu Robert Romawia Royte, Minister leh Bialtu MLA ni bawk chuan thu sawiin Tourism Minister a nihna angin Chite Lui leh a chhehvel tih changtlunna turin hmathlir thui tak a neih thu leh chung a hmathlirte chu chak taka bawhzui a tum thu a sawi a. A bial chhunga luang tlang Chite Lui dinhmunin that lam a pan zel theihna tura ngaihtuahna seng tur leh a tul dan anga tha thawh thin turin mipuite a sawm a. UPC (NEI) thalaiten vantlang tana tha an thawh tawhna hrang hrangte chu amah ngei pawhin a lo hriat ve thin thu leh fakawm a tih thu a sawi bawk a ni.

Bethlehem Vengthlang kaia hawnna inkhawm chu Dr. Zirlianngura, State NSS Officer-in a kaihhruai a. Hnatlang hawngtu Pu C. Lalsawivunga, Bialtu MLA chuan thu sawiin zirlaite chu faina kawngah mite entawn tlaka nung tur an nih thu sawiin faina kawnga hmahruaitu ni zel turin a fuih a. A bial chhunga luang tlang Chite Lui hlutzia sawiin zirlaite chu he lui tana malsawmna ni chhunzawm zel turin a fuih a. Zirlaite leh thalaiten Chite Lui humhalh turin hma an hruai peih anih phawt chuan mipuiten thatho takin an hnung an zui ngei ngei ang tih a rin thu a sawi a. Bialtu MLA anihna angin ani pawhin theihtawp chhuah ve a inhuam thu a sawi bawk a ni.

NSS Hnatlangpuiah hian Pachhunga University College, Synod Higher Secondary School, Govt. Mamawii Higher Secondary School, Govt. Mizo Higher Secondary School, Govt. Zemabawk Higher Secondary School leh Govt. J. L. Higher Secondary School-a NSS Unit volunteer-te leh zirtirtu, an zavaiin mi 300 vel an thawk chhuak a. Tin, Aizawl City PYD Coordination Committee bultumin PYD member mi 400 vel zet an thawkchhuak bawk a ni.

Chite Lui thenfai Hnatlangpuiah hian mi thahnemngai engemawzatin hnatlang hi an tawiawm a, Nagaland Chief Secretary hlui Pu Lalthara, IAS (Retd.) pawhin hnatlangte hi nilengin a tawiawm a ni.

NSS Hnatlangpui hi Favang intan tirah, kumkhatah vawikhat neih thin a ni a, kumin hi a vawithumna a ni.