No.2489/2021-2022

Aizawl Khuangchawi thla ni 5, 2021: Vawiin khan Lawngtlai District Cleanliness Committee chu Faina Hapta 2021 hman mek leh Mizoram Khawpui Fai Intihsiakna 2021 atana inbuatsaihna thlir hovin Lawngtlai Additional Deputy Commissioner Pu James Miahlung hovin Lawngtlai DC Conference Hall-ah an thu khawm.

He hunah hian Urban Development & Poverty Alleviation (UD&PA) Department-a thawktute bakah, Lawngtlai khawpui chhunga village council ai awhte leh faina kawnga veng tina palai atana ruat, Local Ambassador te an tel a. Faina Hapta hman mek thlir hovin, ni tina thawh tur ruahman sa kalpui dan tur an sawi ho va. Mizoram Khawpui Fai Intihsiakna atana inbuatsaihna kal chhohpui dan tur leh hma lakna tura rawtna hrang hrang an sawi ho bawk.

Mizoram Khawpui Fai Intihsiakna 2021 hi category 3-ah kalpui a ni dawn a. Aizawl khawpui chhunga ward 19 te chu category-I-ah inelin, category-II-ah Aizawl tih loh District Hmunpui 10 te an inel ve leh ang a, category-III-ah District Hmunpui baka khawpui dang la awm zawng, khawpui 17 te an inel ve leh dawn a ni. Hei bakah hian Aizawl Municipal Corporation (AMC) huam chhunga faina kawnga hma la tha Local Council leh khawpui 27 chhunga faina kawnga hma la tha Village Council te tan Special Award siam a ni bawk a. Khawpui Fai Intihsiakna atana inbuatsaihna hi October leh November thlaah kalpui niin, November leh December thlaah endik a ni ang a, result puan leh lawmman sem hi Republic Day, 2022-ah buatsaih a ni ang.

Attachment

  • Loading attachment...