October ni 2-9 chhunga hman Faina Hapta 2018 Lawngtlai District tana kharna hun chu ni 9.10.2018 khan Bawrhsap Pu N. Chakhai MCS hovin Lawngtlai DC Conference Hall-ah hman a ni.

Pu N. Chakhai chuan mihring chu fai tura siam kan nih avangin kan fai loh chuan kan hrisel thei lo tih sawiin, faina leh thianghlimna chu nun tihlimtu a ni a, hlim leh hrisel kan duh chuan kan fai reng tur a ni, a ti a. Lawngtlai khawpui pawhin faina lamah hma a sawn ve zel tih sawiin, hmabak hlen tura hma lak a, hma sawn zel tura hma lama pen tlat chu mi tin mawhphurhna a ni, a ti.

He hun hi Sub-Deputy Commissioner Pu Lalsanglura MCS chuan a kaihruai a. Faina Hapta 2018 hman chhunga hotel, restaurant, school leh office fai thlan chhuahte hnenah lawmman hlan nghal a ni.

Hotel fai berah Lairam Hotel, Bazar Veng, pahnihna Carolyn Hotel, Bazar Veng leh pathumna Lairam Hotel-II, Bazar Veng te thlan an ni a. Restaurant fai berah New Adalia Restaurant, Bazar Veng, pahnihna MD Restaurant, Chandmary leh pathumna God's Gift Restaurant-II, Bazar Veng te thlan an ni.

School zingah New Model English School chu fai bera thlan niin, Rev. Thanzinga Memorial School leh Don Bosco School te'n a indawtin an zui a. Sawrkar office zingah Land Resources, Soil & Water Conservation Department office chu fai bera thlan a ni a, Principal, ANM School Lawngtlai office-in dawtin, District Education Office chu pathumna an ni.

Vawiina Faina Hapta kharnaah hian sawrkar official-te, zirlai naupangte leh lawmman dawngtute an kal khawm a ni.