4345/2025-2026

Lawngtlai, 9th February 2026: Vawiin khan Lawngtlai District Level Committee on Fire Prevention - bultumin 'Fire Prevention Week 2026' hawnna inkhawm DC Conference Hall-ah neih a ni a. Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA nibawk chuan khuallian niin hawnna a nei a, Lawngtlai Bawrhsap Pu Donny Lalruatsanga chuan hun a kaihruai.

Dr. Lorrain Lalpekliana Chinzah chuan kangmei laka Lawngtlai District- a him theih nan lawm taka 'Fire Prevention Week' a hawn thu a sawi a. Ram kangin Mizoram a tichhiat nasat dan hriain sawrkarin theihtawp a chhuah thin a, ram kang ven kawngah khaw tinten theihtawp an chhuah theih nan lawmman te pawh a siam sak hial a ni, a ti. Thâl laiah kangmei a chhuak nasa zuala, fimkhur a tul hle tiin, a bik takin huan leh lo neite mei kawng tha tak sial turin a chah a ni. MLA chuan ram kang hian ram rohlu- thing leh mau, Nungchate tichereuin tuihna a titlem tih hriat a pawimawh hle a, ram tihkan avanga ramin a tawrhna chhuta fimkhur a hun tawh tak zet a ni, a ti. Khuallian chuan Village Level Fire Prevention Committee - te theihtawp chhuah tur leh thupek kenkawh kawngah leh mipuite zirtir kawngah theihtawp chhuah turin a ngen a.Sawrkar department, NGO, VC, Chanchinbu mite leh Kohhrante pawh theihtawp chhuah turin a sawm a ni.

Adviser to Chief Minister chuan ram kang ven hna chu midang kutah dah theih a ni lo tih sawiin, mi tinin mawhphurhna an nei tiin mahni zawn theuhah thahnem ngaih a tul a ti a. Lawngtlai District- in kang mei ven kawngah lawmman lo la tawh thin mahse tun dinhmunah hmasawnna tura tam hle nia a hriat thu a sawi. Kuminah pakhatna lawmman la thei turin theihtawp i chhuah tlang ang u tiin a sawm a ni. Dr. Lorrain Lalpekliana Chinzah chuan tanrual hi chakna a ni tiin Lawngtlai District- mipuite kangmei ven kawngah tangrula turin a fuih a. Ram nuam leh chhenfakawm siam turin ramngaw neih that a pawimawh hle tiin Adviser to Chief Minister chuan tlawmgngaihna nen theihtawp chhuaha kangmei veng turin Lawngtlai District- mipuite a ngen nghal bawk.

Pu Donny Lalruatsanga chuan kalkhawmte lawmna thu sawiin, kangmei chhuak lo turin mitinin mawhphurhna an nei tiin, kangmei laka fimkhur turin Lawngtlai District- mipuite a chah a ni. Pu K. Lalromawia, Member Secretary, Lawngtlai District Level Committee on Fire Prevention leh District Council Conservator of Forest nibawk chuan report pekna neiin, thu intiamkamna hun a kairhuai a. Pu B. Lalrinmuanpuia, ACF, LADC, chuan Power Point Presentation hmangin 'Sensitisation/Awareness Campaign' hun a hmang a ni.

Fire Prevention Week- hi kum 2000 atang khan kum tin thupui thlan bik neia hman thin a ni a, kumin thupui atan 'Nungchate chenna leh tui thianghlim min petu ramngaw kangmei lakah venghim rawh' tih thlan niin, 9th - 13th February,2026 chhung hman a ni ang.

Vawiin hun hmannaah hian Mizoram sawrkar leh LADC lama hotute, VC, NGO,MJA leh Kohhran aiawhte  an tel thei a, Pu MS Dawngliana, General Secretary, Lawngtlai District Village Council Association,  chuan lawmthu sawina neiin hun a khar.